原來正價已叫優惠咗!衛訊、蘇寧推 iPhone 13 Pro 系列正價優惠

左定坤 (Cho Ting Kwan) 2021-11-26 20:22 | Apple
唔知幾時開始,原來正價賣已經叫係優惠,仲要大大力去做宣傳。大家都知,今日係 Black Friday 啦,版主都有分享唔少 Black Friday Amazon 優惠着數畀大家,未必啱你心意,但起碼都係叫有平,有優惠。但今日見到,衛訊同蘇寧有 iPhone 13 Pro 系列嘅 Black Friday 優惠,不過睇完 what the...... 優惠咗㗎喇?

先望下衛訊,佢就話首先你要去呢個網址登記拎 Quota,就可以由即日起至 11 月 28 日去衛訊各門市,用建議零售價購買 iPhone 13 Pro 或者 iPhone 13 Pro Max (128GB / 256GB) 一部,名額限量 1000 個。無錯呀,你無睇錯,優惠原來即係無減價,而且都仲要限量。明嘅,出面 iPhone 13 Pro / Pro Max 確係貨唔多,但用正價去當優惠有少少怪咗啲。唯一叫做好睇少少嘅優惠,咪用正價 95 折加購 AppleCare+ 保障服務囉。而想再着數少少,就用埋 Citi 信用卡簽帳,有即減 $400 折扣,但呢個折扣基本嘢嚟啫,係咪 Black Friday 都會有。

而蘇寧門市其實都差不多,將 iPhone 13 全系列「正價」優惠,一樣有 95 折加購 AppleCare+ 保障服務,叫做唔同啲嘅,咪信用卡優惠改成 DBS,同埋折扣高達 $940 囉。不過,衛訊都仲有講明限量 1000 部,蘇寧有幾多部就真係唔清唔楚,見到有網友留言:「Apm 無 Max, 仲要炒價, X人既」(X=粗口字眼),到底呢個優惠係咪為做而做呢?定係而家買手機已經變到,嗱你買到已經益咗你,便宜咗㗎喇?你又點睇呢?
 

最新新聞