入手 Sony 手機前，特約經銷商要留意！
之前版主都比較少分享 Sony 手機係細鋪的場情，主要原因係因為 Sony 有指定的特約經銷商，除左一眾大家熟悉的大鋪之外只有為數唔多的細鋪，選擇上相對比其他大牌子少。如果大家想知邊啲細鋪係 Sony 指定經鋪商方法其實都好簡單，因為係 Sony Mobile HK Facebook 上有提到的。今次版主就從中選左四間去睇，發現係價錢上比起大鋪果然係有優勢的，不論係 Xperia Z3 、 Z3 Compact 甚至近來新出的 Xperia Z3+ 、 M4 Aqua 以及 C4 都有不同程度的減幅，接下來就講下版主有甚麼發現先！
▲ 想知邊間係 Sony 特約經銷商大家可以到 Sony Mobile Facebook 查看。
細鋪入手更著數？ Z3 Compact 三千有找， Z3 平過大鋪
首先講左 Sony 係 2014 年的旗艦 Xperia Z3 同埋 Z3 Compact 先，係規格上兩者其實好相似，同樣具有旗艦級數。主要不同在於 Z3 Compact 係屏幕方面得 4.6 吋同 720p 解像度而 Z3 有 FHD 5.2 吋芒。雖然規格相似但兩者係細鋪的情況係有點不一樣的，當中 Xperia Z3 目前仍然有不少細鋪賣緊，好似飛天流動、 M PHONE 同埋通訊無限都仍然有。係價錢方面都比大鋪平，四千樓下就有交易，版主見過最平賣 $3798 ，比起大鋪平四百幾蚊啊！至於 Z3 Compact 方面，大家想平買的話看來都係快快入手為妙了。一來版主留意到已經唔係所有大鋪都有展示呢部機，二來係細鋪方面 Z3 Compact 都已經好難搵到，換言之可能已經到左最後一水都唔定。幸好版主係先達一間 Sony 認可的細鋪中仍然見到 Z3 Compact 的蹤影，係價錢方面都算係吸引，只係 $2980 ，比起大鋪平六百蚊！
▲ Z3 賣價方面細鋪同樣會比大鋪抵玩。
▲ Z3 Compact 細鋪行貨跌到落二字頭，大家覺得算唔算抵玩？
Xperia Z3+ 、 C4 Dual 、 M4 Aqua 同樣有減，抵唔抵玩？
如果以今年推出新機來計， Sony C4 Dual 以及 M4 Aqua 係 Sony 目前仍未在大鋪有減價的機種。以性價比來講其實 M4 Aqua 算係不錯，雖然只有 720p 解像度但係支援防水同時支援雙卡而且外型都有 Z 系列的 Omnibalance 風格。版主到幾間細鋪睇過，基本上都可以用比起大鋪平兩百的價錢入手兩部 Sony 中價機。亦即係 C4 只需 $2698 而 M4 Aqua 都只係 $2498 。當然大鋪目前賣緊 $5128 的 Z3＋ 係細鋪入手的話都係有平的，之前版主就同大家分享過 Z3+ 係細鋪 $4630 就可以買到，平足一千！唔知大家又覺得邊一部 Sony 手機最岩心水呢？不妨留言講講啦！
▲ Xperia Z3+細鋪 $4630 呢個價錢比本身定價 $5698 真係「減足一千」。
在文章發佈的時侯，Sony Xperia M4 Aqua 賣價為 $2,698, 按此看詳細規格和最新賣價。
在文章發佈的時侯，Sony Xperia C4 賣價為 $2,898, 按此看詳細規格和最新賣價。
在文章發佈的時侯，Sony Xperia Z3 Compact 賣價為 $3,598, 按此看詳細規格和最新賣價。
在文章發佈的時侯， Sony Xperia Z3 賣價為 $4,228，按此看詳細規格和最新賣價。
在文章發佈的時侯， Sony Xperia Z3+ 賣價為 $5,128，按此看詳細規格和最新賣價。