S625 港行千一蚊唔使!紅米 Note 4X 版主開箱評測

左定坤 (Cho Ting Kwan) 2017-03-09 21:36 | 小米
版主早排就同大家提到,小米將會在 3 月 14 日發表兩部新機,分別為小米 Note 2 以及紅米 Note 4X,而且就連賣價,官方都已經公佈埋。咁就價錢嚟講,其實版主覺得小米 Note 2 個硬件配置,絕對係配得起 $3999 呢個價錢,不過總會有人覺得: 四千蚊買小米?唔會囉!版主好明白網友們的心態,反而另外果部紅米 Note 4X,又似乎係幾抵玩下,千一蚊唔使有 S625 手機,三星唔使玩啦係咪先?紅米 Note 4X 香港版,版主剛剛已經有機到手,急不及待先同大家做個簡單的開箱評測,講下我的第一感覺,順便跑埋分。睇下文啦!

紅米 Note 4X(Facebook).jpg

全金屬機身 + 5.5 吋芒!紅米 Note 4X 版主開箱!

剛到手,版主的第一感覺就係: 咦?就同紅米 Note 4 差不多。版主手上有的紅米 Note 4X 是灰色的版本,機背同樣用上全金屬機身設計,唔知係咪果陣紅米 Note 3 的時候俾版主講過黎,之後的紅米 Note 4 以及而家的紅米 Note 4X,終於都似番啲樣,摸上去會有明顯的金屬感,而非以前果種假金屬。對於手掌大的人來說,呢部紅米 Note 4X 上手的手感應該都會不錯,但因為版主比較手細,始終未能俾到我舒服的感覺,我自己覺得,如果佢機身再「瘦啲」,咁應該就會更加有 feel。唔講咁多,直接開箱啦!

IMG_3128.JPG
▲ 呢個就係紅米 Note 4X 的包裝盒,盒頂隱約會見到寫住 4X (相中睇得唔係咁清楚,下面會睇得清楚啲),而側面則寫住 Redmi Note 4X。

IMG_3129.JPG
▲ 包裝盒底部會寫有一些紅米 Note 4X 的基本配置資料。

IMG_3132.JPG
▲ 開箱!香港版的紅米 Note 4X,入面會有火牛、USB 線、說明書以及 SIM 卡針 (唔好意思俾電話壓住左)。

IMG_3133.JPG
▲ 因為平價,所以都唔能夠要求充電有幾快。火牛上可以見到,輸出只有 5V / 2A,即係 10W。

IMG_3134.JPG
▲ 即刻睇實機,紅米 Note 4X 用上了 5.5 吋 2.5D 屏幕,體積為 151 x 76 x 8.45 mm。

IMG_3135.JPG
▲ 正面的上方會見到有 Sensor、聽筒以及 500 萬像素的前置鏡頭,相機有 F2.0 光圈,並支持第二代智能美顏功能。

IMG_3136.JPG
▲ 而正面的下方,則有大部份手機都具備的「三天皇鍵」,即係多工鍵、主頁鍵以及返回鍵。

IMG_3137.JPG
▲ 機背用上了金屬材質,同紅米 Note 4 一樣有金屬感,而非紅米 Note 3 果種「假金屬」。

IMG_3138.JPG
▲ 機背上方會有 1300 萬像素主鏡頭,相機採用 5 片式的構造,同樣有 F2.0 光圈,下方有雙色溫閃光燈以及指紋辨識器。

IMG_3139.JPG
▲ 而機背下方則會見到小米的 Logo。

IMG_3140.JPG
▲ 右側會見到音量鍵以及開關鍵。根據版主過去經歷,音量鍵位置好似都幾易壞,唔知今次版主會用幾耐先出問題呢?

IMG_3142.JPG
▲ 左側則有孤寒式雙卡插槽。

IMG_3143.JPG
▲ 機頂會見到有 3.5mm 耳機孔。

IMG_3144.JPG
▲ 而機底則有兩個喇叭位以及 microUSB 充電插口。

IMG_3146.JPG
▲ 上手!其實唔計我隻手唔夠大,整體來說手感都算係不錯的,但我個人會覺得,如果機身可以造得再「瘦啲」,咁或者會更加好。

跑分軟件試效能!平價 S625 手機,夠唔夠三星 C7 鬥?

配置方面,紅米 Note 4X 配備了 Qualcomm S625 處理器,內置 3GB RAM 以及 32GB ROM,無錯放在今時今日,32GB 確實都係少左啲,不過 3GB RAM 就算係相當夠用。版主對 S625 處理器最深刻的印象,八個字總結: 超級慳電,續航無敵。所以內置 4100mAh 的紅米 Note 4X,續航能力我絕對不擔心,但效能方面又如何呢?版主利用安兔兔跑分軟件,幫呢部紅米 Note 4X 跑左次分,睇下又夠唔夠 Samsung Galaxy C7 鬥。結果如下:

IMG_2017-03-09 21:10:50.jpgIMG_2017-03-09 21:10:17.jpgIMG_2017-03-09 21:10:56.jpg
▲ 安兔兔跑分結果為 61936 分,但有趣的是,佢顯示的名稱唔係紅米 Note 4X,而係紅米 Note 4,不過就係用上 Qualcomm S625 處理器的版本,並內置 3GB RAM 以及 32GB ROM。而呢個分數,則相比紅米 Note 3 仲要低分,同 Samsung Galaxy C7 得出的分數差不多。但 C7 而家大舖減極價都要 $2999,紅米 Note 4X 港行 $1099 就可以入手,如果在 S625 手機來說,你又會唔會考慮呢部紅米 Note 4X 呢?

紅米 Note 4X 係文章刊登時,賣價為 $1099,按這裡有更詳細規格及最新賣價
 

相關產品 (1)

相關報導 (2)

千元手機愈賣愈平! 日韓手機性價比鬥大陸機?

千元手機愈賣愈平! 日韓手機性價比鬥大陸機?

有一個好奇怪的現象,好多時候版主講親大陸機,網友們都怨聲連天,好似淨係見到大陸機,都已經污染佢哋雙眼咁。但問題係,依然有不少網友會投向大陸機的懷抱,點解?唔係因為大陸機有幾好用,而係因為性價比夠高,用來粗用一流,真係咁唔好彩跌爛左,都唔會覺得好肉赤。不過,最近版主留意到,有唔少大廠的千元手機愈賣愈平,又能唔能夠做到比大陸機更吸引呢?睇下文啦!

左定坤 (Cho Ting Kwan) | 2017-03-12
S625 港行千一蚊唔使!紅米 Note 4X 版主開箱評測

S625 港行千一蚊唔使!紅米 Note 4X 版主開箱評測

版主早排就同大家提到,小米將會在3月14日發表兩部新機,分別為小米Note2以及紅米Note4X,而且就連賣價,官方都已經公佈埋。咁就價錢嚟講,其實版主覺得小米Note2個硬件配置,絕對係配得起$3999呢個價錢,不過總會有人覺得:四千蚊買小米?唔會囉!版主好明白網友們的心態,反而另外果部紅米Note4X,又似乎係幾抵玩下,千一蚊唔使有S625手機,三星唔使玩啦係咪先?紅米Note4X香港版,版主剛剛已經有機到手,急不及待先同大家做個簡單的開箱評測,講下我的第一

左定坤 (Cho Ting Kwan) | 2017-03-09

最新新聞