6.9 吋巨芒 + 5500 大電!小米 Max 3 香港有價,千元價位好吸引?
|
小米
版主成日都會遊走大埔、旺角、深水埗,在這幾個區域行場,所以漸漸地,同某些店舖間唔中都有傾有講。而最近就講到小米 Max 3 就快有賣,連定價都話咗俾版主知。根據收到的風聲表示,小米 Max 3 香港建議零售價會是 $1999,會賣 4GB + 64GB 版本,並會於下星期四 (即 23/8) 正式在香港開賣。
點解說小米 Max 3 用 18:9 芒,但都依然係大芒照舊呢?原因就係,佢進一步將屏幕的尺寸提升至 6.9 吋,但亦多得 18:9 芒,所以令到機身大小保持跟舊代小米 Max 2 差不多。至於配置部份,小米 Max 3 用上了 Qualcomm S636 處理器,呢粒處理器曾在 ASUS ZenFone 5 上用過,效能算是不錯,一般打機都無問題。另外,大電亦是小米 Max 3 的賣點,內置 5500mAh 電池,相信滿足一天使用絕對唔難。
相機部分,小米 Max 3 配置 12MP + 5MP 雙主相機、1.4μm 像素尺寸、支援 Dual Pixel 對焦和 f/1.9 光圈。相機也支援 AI 場景辨識,可識別 206 種場景。前相機則是 8MP、1.12μm 像素尺寸、f/1.9 光圈。
睇完以上的介紹,小米 Max 3 賣 $1999 呢個價,網友覺得係咪好吸引呢?
小米 Max 3 在文章發表時,4GB + 64GB 建議零售價為 $1999,按這裡有詳細規格及最新賣價。