中階鬥旗艦,同分對決!小米 Note 10 Pro 開箱評測 相機挑機華為 Mate 30 Pro

左定坤 (Cho Ting Kwan) 2019-11-27 17:57 | 小米
早前小米發表首部億萬像素新機,大陸叫 CC9 Pro,而香港就以 Note 10 系列命名。當時小米就講到,新機 DxOMark 成績同華為 Mate 30 Pro 同分,但其實只限於尊享版,所以之前 Daniel 去北京試果部,只係 Note 10,並未發揮到其相機的實力。今日正式香港現身,版主就借得 Note 10 Pro (即大陸尊享版 CC9 Pro) 開箱評測,並跟華為 Mate 30 Pro 來個同分對決!睇下文啦!

FB.jpg

小米 Note 10 Pro 開箱

開箱之前,循例都要同網友講下,到底小米 Note 10 Pro 在外型上有乜特點。事實上,在外觀上 Note 10 Pro 同 Note 10 都係一樣,機身正面用上 6.47 吋 3D 曲面 AMOLED 芒,並且屏幕擁有 400000:1 嘅高對比度,令到顯示色彩更加鮮豔,同時達到黑白更鮮明嘅效果。同時,小米 Note 10 Pro 個芒同背面都用咗康寧第五代大猩猩玻璃,令到手機無咁容易被各種外力刮花以及跌損。而機背更採用咗弧形設計,令手感更加舒服。

好,外觀介紹就到呢度,而上篇文章中版主已經提到,小米 Note 10 Pro 有冰雪極光、魔法綠境以及暗夜魅影三種顏色選擇,今次版主上手嘅係冰雪極光色嘅 Note 10 Pro,同華為 P30 Pro 嘅極光色相似,即刻同大家做個簡單開箱。
 

小米 Note 10 Pro 效能跑分測試

配置部分,小米 Note 10 Pro 配備咗 Qualcomm Snapdragon 730G 處理器,呢粒處理器並非旗艦級,而是屬於中階級別,但畢竟效能不算小米 Note 10 Pro 賣點,而係佢個相機,況且 S730G 處理器其實性能唔差,安兔兔跑分都有廿六萬多,直逼 S845 舊代旗艦 U,都已經睇得,又用得,打機都一樣得。除咗安兔兔跑分測試 CPU、GPU 效能,版主亦會用 AndroBench 5 測試 ROM 的連續 / 讀寫速度,有關成績睇埋落去自有分曉!

Screenshot_2019-11-27-17-47-41-150_com.antutu.ABenchMark.jpgScreenshot_2019-11-27-17-51-22-921_com.andromeda.androbench2.jpg
▲ 左圖為安兔兔跑分的成績,而右圖則為 AndroBench 5 的成績。先講咗安兔兔,跑分結果為 261321 分,當中的 CPU 成績有 94670 分,而 GPU 成績則有 70925 分,呢個成績拍得住舊代旗艦處理器 S845 嘅分數。而 AndroBench 5 係用嚟測試 ROM 嘅連續 / 隨機讀寫速度,當中就以隨機讀寫速度更為重要,因為會直接影響到使用體驗,隨機讀取速度 122.47 MB/s,隨機寫入速度則為 114.7 MB/s,呢兩者嘅速度都比起旗艦級嘅三星 Galaxy Note10 快 (根據 ePrice 測試記錄,Note10 隨機讀寫速度分別為 95.91 MB/s 以及 115.12 MB/s)。

1 億像素,DxOMark 最高分!小米 Note 10 Pro 比拼華為 Mate 30 Pro

如頭先所講,小米 Note 10 Pro 嘅賣點應該係相機先啱,配備五個主鏡頭,分別為 1.08 億像素超高解像度主鏡頭、500 萬像素長焦鏡頭、1200 萬像素人像鏡頭、2000 萬像素廣角鏡頭以及 200 萬像素微距鏡頭,呢五個鏡頭組合提供 0.6 倍至 50 倍無縫變焦嘅體驗。

跟小米 Note 10 唔同之處,在於小米 Note 10 用上七片式鏡頭,而小米 Note 10 Pro 則用上八片式鏡頭,相比起七片式鏡頭能夠捕捉到更清楚、更銳利嘅影像,其相機實力之高,甚至仲拍得住華為 Mate 30 Pro,DxOMark 評分同為 121 分,而四千樓下價位嘅手機嚟講,算係超級不錯。

根據 DxOMark 的評價,小米 Note 10 Pro (CC9 Pro 尊享版) 廣角相機變形嘅情況唔多,喺細節上保留到位,而且大部份情況下噪點控制得很好,在光線變化時嘅曝光調整亦都很不錯,同時成像色彩亦相當悅目,講到咁無敵咁,又係咪真係咁好呢?版主就找來同分嘅華為 Mate 30 Pro,同大家比拼一下兩部手機的拍攝質素。

超廣角拍攝 (左:小米 Note 10 Pro;右:華為 Mate 30 Pro)
 
IMG_20090101_021606.jpg
IMG_20191127_141421.jpg
 
▲ 先講廣角鏡頭拍攝,可以留意到,同一個位置拍攝尖沙咀鐘樓,可以明顯地見到小米 Note 10 Pro 比起華為 Mate 30 Pro 更廣角,而睇返數字,小米 Note 10 Pro 可以拍攝出 120 度超廣角照片,而 Mate 30 Pro 廣角焦段為等效 18mm,即大約 100 度。另外,從上圖都可以見到,小米 Note 10 Pro 喺背光環境下,影出嚟嘅相片比起 Mate 30 Pro 更光亮,但銳利度就無華為咁強。

一般拍攝 (左:小米 Note 10 Pro;右:華為 Mate 30 Pro)
IMG_20090101_022041.jpg
IMG_20191127_141926.jpg

▲ 去到 1x 普通拍攝,喺大家都開咗 AI 相機嘅情況下,可以見到小米 Note 10 Pro 味精似乎 over 咗,顯得藍得好誇張,反觀華為 Mate 30 Pro 則比較自然一點。

5 倍 Zoom (左:小米 Note 10 Pro;右:華為 Mate 30 Pro)
IMG_20090101_021619.jpg
IMG_20191127_141434.jpg
▲ 從呢組相片可以見到,首先就係小米 Note 10 Pro 5x Zoom 之後,成像色彩都保持鮮豔,視覺感覺比華為 Mate 30 Pro 還要好。而因為小米 Note 10 Pro 具備 5 倍光學變焦,而華為 Mate 30 Pro 個 5 倍只係混合變焦,一放大睇張相立見高下,小米 Note 10 Pro 成像比起華為 Mate 30 Pro 還要清晰,雜訊噪點亦相對更少。

夜景模式:(左:小米 Note 10 Pro;右:華為 Mate 30 Pro)
IMG_20191127_204606.jpg
IMG_20191127_204542.jpg
▲ 兩張相都係用夜景模式拍攝,論色準,華為 Mate 30 Pro 夜拍色準度比小米 Note 10 Pro 高,更能還原現場環境色準,的確,現場係黃光底下,小米 Note 10 Pro 影出嚟係有少少偏紅。而且,Mate 30 Pro 色彩層次更為鮮明。不過咁,當我放大兩張相嚟睇,覺得細緻度上小米 Note 10 Pro 比華為 Mate 30 Pro 更清晰。

華為 Mate 30 Pro 沒有的功能 (1):50 倍數碼變焦
雖然 50 倍 Zoom 呢個功能係由華為 P30 Pro 首推,但唔知點解去到 Mate 30 Pro,卻又閹割咗呢個功能,最盡只可以去到 30 倍 Zoom,所以呢度我就唔將兩部機比較,純粹畀大家睇下,到底小米 Note 10 Pro 影到 50 倍 Zoom 果陣,會影到啲乜。

IMG_20090101_022133.jpg
▲ 頭先 1x 普通拍攝,咪影咗張渡海小輪相嘅,而家呢張相就正正係同一個位,用 50x Zoom 影,連船上個男人坐喺度睇緊報紙,都影得到。不過,影到還影到,但就同華為之前 P30 Pro 一樣,都係好模糊不清,就好似閉路電視果種質素咁。但 so?影到已經好屈機。

華為 Mate 30 Pro 沒有的功能 (2):108MP 超高像素
IMG_20090101_020748.jpg
▲ 呢個 1 億像素其實係令我印象好深刻嘅功能,本來以為用 Samsung 感光元件,質素唔方好,但實際試過之後,咦,又唔差喎,細緻度又真係相當高,不過因為都成億像素,張相尺寸大小成 2X MB 咁大。

小結

小米 Note 10 Pro 12 月 5 日開賣,香港建議零售價 $3999,以一部四千蚊有找嘅手機,雖然佢唔係旗艦機,只係一部 S730G 嘅中階機,賣呢個價以小米手機嚟講係貴,有人話,點解唔考慮小米 9T Pro 呢?$3599 起仲有 S855 旗艦 U 𠻹喎。係嘅,如果以 U 論 U,$3599 S855 同 $3999 S730G,大家都係小米,好似唔合邏輯。

但無計,小米 Note 10 Pro 除咗 CPU 之外,其他相機硬件上比起小米 9T Pro 強得多,電有 5260mAh,又有 30W 快充,續航表現比小米 9T Pro 一定好好多。而相機又有五鏡頭,而且仲有全港首部 1 億像素鏡頭,實際試完又確係唔算差,咁成本大咗,賣價貴啲,都係合理。

事實上,Note 10 Pro 係我近期鮮有興趣嘅小米手機,外貌與實力都有,唔知網友又對呢部手機有無興趣呢?

小米 Note 10 Pro 在文章發表時,建議零售價為 $3999,按這裡有詳細規格及最新賣價

相關產品 (1)

相關報導 (2)

中階、旗艦同分對決!小米 Note 10 Pro 評測 挑機華為 Mate 30 Pro

中階、旗艦同分對決!小米 Note 10 Pro 評測 挑機華為 Mate 30 Pro

早前小米發表首部億萬像素新機,大陸叫CC9Pro,而香港就以Note10系列命名。當時小米就講到,新機DxOMark成績同華為Mate30Pro同分,但其實只限於尊享版,所以之前Daniel去北京試果部,只係Note10,並未發揮到其相機的實力。今日正式香港現身,版主就借得Note10Pro(即大陸尊享版CC9Pro)開箱評測,並跟華為Mate30Pro來個同分對決!睇下文啦!

左定坤 (Cho Ting Kwan) | 2019-11-27
108MP 五鏡手機開賣!爆小米 Note 10 系列香港賣價 平鬥華為

108MP 五鏡手機開賣!爆小米 Note 10 系列香港賣價 平鬥華為

不少人都期待的小米Note10系列手機,亦即是大陸傳說中用上1億像素鏡頭的CC9Pro國際版,今個星期將會低調在香港發表。而版主收到風,小米Note10系列會有兩款手機,分別為小米Note10以及小米Note10+(相信是海外版的Note10Pro,只是命名方式不同),而用上1億像素相機的手機,香港賣價居然不貴,依然維持四千樓下的價位,網友又點睇呢?

左定坤 (Cho Ting Kwan) | 2019-11-26

最新新聞