五千大電四鏡千元手機!紅米 Note 9 Pro 開箱評測

左定坤 (Cho Ting Kwan) 2020-05-14 21:50 | 小米
小米今日出咗兩部手機,分別為小米 Note 10 Lite 同紅米 Note 9 Pro,老實講我覺得兩部手機定位相當接近,大家都有 over 5000mAh 嘅大電,大家都有四鏡頭,而且規格都好接近,畀我感覺有種「自己打自己」嘅 Feel。Daniel 已經為大家介紹過當中嘅小米 Note 10 Lite,而家就等我同大家寫篇紅米 Note 9 Pro 嘅開箱評測啦!睇下文啦!

FB.jpg

紅米 Note 9 Pro 開箱睇外觀

作為一部紅米手機,紅米 Note 9 Pro 維持係千元價格,只需 $1899 就有交易,價錢上係幾抵玩嘅。但老實講,手機外觀就一般般,有 6.67 吋 20:9 大芒,用咗穿窿芒設計,機背有四個主鏡頭,感覺係一部無乜特別嘅手機。有少少失望嘅係,原先睇官圖以為會係好似華為 P40 Pro、TCL 10 Pro 咁,用上霧面磨砂面,但原來都只係用玻璃機背,版主期待今年內,小米會出一部用上磨砂面嘅手機。畀你揀,你會揀玻璃面,定磨砂面?

唔講咁多,開咗箱再講!
   

S720G 係咩料子?速睇紅米 Note 9 Pro 跑分效能

紅米 Note 9 Pro 配備了 Qualcomm Snapdragon 720G 處理器,內置 6GB RAM 以及 128GB ROM,電池容量有 5020mAh,並支持 30W 快速充電。平時手機 7 系 U,見得多都係 S710 呀、S730 呀,但今次就用上 S720G,係乜料子?版主就用安兔兔評測以及 AndroBench 5 跑分軟件,去測試一下手機的效能。

Screenshot_2020-05-14-13-08-08-508_com.antutu.ABenchMark.jpg
▲ 根據安兔兔評測跑分結果,配備 S720G、6GB RAM、128GB ROM 的紅米 Note 9 Pro,總分有 277960 分,當中的 CPU 成績有 101039 分,而 GPU 成績有 71054 分。比較返 Daniel 分享、用上 S730G 處理器的小米 Note 10 Lite,S720G 的跑分成績居然係比 S730G 還要高。

Screenshot_2020-05-14-12-47-26-723_com.andromeda.androbench2.jpg
▲ 至於 AndroBench 5 係用嚟測試 ROM 嘅讀寫速度,連續讀取 / 寫入速度分別有 478.24 MB/s 以及 195.17 MB/s,符合 UFS 2.1 的標準;而影響用家使用體驗嘅隨機讀取 / 寫入速度,則有 109.38 MB/s 以及 55.16 MB/s,理論上唔會話十分順暢,但使用時都唔會有好窒嘅感覺。

配四個主鏡頭!紅米 Note 9 Pro 相機實拍

紅米 Note 9 Pro 同小米 Note 10 Lite 一樣,都係有四個主鏡頭,兩者配置上都好接近,大家都係有 6400 萬像素高解像度鏡頭同埋 800 萬像素超廣角鏡頭,不過小米 Note 10 Lite 嘅超廣角鏡頭會再 Wide 少少,支持 120 度視角,而紅米 Note 9 Pro 則支持 118 度視角,但實際唔會相差太遠。

至於其餘兩個鏡頭,小米 Note 10 Lite 就有 500 萬像素景深鏡頭同 200 萬像素微距鏡頭,而紅米 Note 9 Pro 就剛好調返轉,有 500 萬像素微距鏡頭同 200 萬像素景深鏡頭。兩者嘅微距鏡頭都係支持最近 2cm 嘅拍攝距離,就算包裝盒上嘅細字,都可以近距離影得到。

以下就畀幾張紅米 Note 9 Pro 影出嚟嘅相畀大家睇:

標準拍攝
IMG_20200514_124907.jpg
▲ 以一部千元手機嚟講,我覺得佢相機算係做得唔錯,就算放大嚟睇,都唔會覺得有好多噪點,而且色準算幾唔錯。

超廣角拍攝
IMG_20200514_124922.jpg
▲ 不過一到超廣角拍攝,就有少少出事,縮圖無限好,但放大會見到有少許模糊的情況。

2x Zoom 拍攝
IMG_20200514_124938.jpg

10x Zoom 拍攝
IMG_20200514_124955.jpg
▲ 紅米 Note 9 Pro 最多支持 10x 數碼變焦,版主喺 The One 19 樓影過去 iSQUARE,你可以見到大廈上嘅字都睇得清楚。

64MP 超高解像度拍攝
IMG_20200514_124855.jpg
▲ 64MP 高像素鏡頭影出嚟嘅相,放大睇反而覺得不及標準拍攝清晰。

微距拍攝
IMG_20200514_125157.jpg
▲ 支持最近 2cm 微距拍攝,包裝盒上細字都可以近距離拍得好清楚。

小結

好快咁玩完紅米 Note 9 Pro,我覺得其實跟同場發表嘅小米 Note 10 Lite,並唔係真係相差好遠,雖然外型係有分別,但效能上就不相伯仲,而且紅米 Note 9 Pro 反而仲有少少比小米 Note 10 Lite 效能還要高。而相機方面,以一部 $2000 都唔使嘅千元手機,我會覺得呢部手機影相算係幾唔錯,絲毫唔覺得係一部千元手機影出嚟嘅相,無論色準、細緻度方面,我覺得都屬於可以接受嘅範圍,又可以玩齊超廣角、微距等功能。如果紅米 Note 9 Pro 同小米 Note 10 Lite 畀我揀,我會揀前者,反正唔係相差太遠,慳返六舊水仲好啦~你又點揀呢?

紅米 Note9 Pro 在文章發表時,建議零售價為 $1899,按這裡有詳細規格及最新賣價

最新新聞