開箱!黑與金的配搭,更顯 Premium 味道!
在外觀上,Vivo X20 Plus UD 除了顏色同 X20 Plus 有少少不同之外,其餘部份都幾乎同之前的一樣。X20 Plus 擁有黑色的機身,留意一點,雖然 X20 Plus 同樣係有黑色的版本,但不同的是,X20 Plus UD 有黑色機身的同時,鏡頭、Logo、機身邊框部份是以金色為襯托,顯得好有 Premium 的感覺。X20 Plus UD 採用了 3D 弧形機身設計,手感挺是不錯,另外 X20 Plus UD 亦採用了 6.43 吋 18:9 FHD+ 屏幕,鍾意大芒的網友,或者會對佢有少許興趣吧?唔講咁多,先睇開箱!▲ 呢個係 Vivo X20 Plus UD (屏幕指紋版) 包裝盒。你可以見到,包裝盒上好明顯有指紋的圖案,而啲字係用金色鍍上去的。
▲ 同 X20 Plus 不同的是,X20 Plus UD 係配備 128GB ROM,而 X20 Plus 只有 64GB。
▲ 側面會見到俄羅斯 FIFA 世界盃 2018 的圖示。
▲ 打開個包裝盒,第一眼係見到 X20 Plus UD 實機。
▲ 如果再揭開,下層會見到有一個黑色的保護套、耳機、火牛、USB 線以及 SIM 卡針。
▲ 跟機火牛支持最高 22.5W 輸出。
▲ Vivo X20 Plus UD 具有 6.43 吋 FHD+ 顯示屏。
▲ 屏幕上方有 1200 萬像素前置鏡頭。
▲ 隱約見到,機身側面係有金色的鍍邊。
▲ 而機背用上 3D 弧形設計,這樣的設計更能增加手感。
▲ 留意一下,同 X20 Plus 不同的是,X20 Plus UD 鏡頭邊緣同 Logo,都係用上金色,而黑襯金的配合,顯得更有 Premium 的感覺。
▲ 機身右側會有音量鍵以及開關鍵。
▲ 而機身左側則有 SIM 卡槽。
▲ 機底部份可以見到有單喇叭、microUSB 插槽以及大家最愛的 3.5mm 耳機孔。
▲ 可以見到,在解鎖畫面上會話你知屏下指紋的位置,版主個人覺得係型嘅~
S660 處理器有 128GB,Vivo X20 Plus UD 效能即睇
配置部份,Vivo X20 Plus 配備了 Qualcomm Snapdragon 660 處理器,內置 4GB RAM 以及 128GB ROM,對於大部份人來說,即使唔使用 microSD 卡,128GB 應該都相當夠用。而 S660 呢粒處理器,其實相信不少網友都對呢粒 U 的威力並不陌生,算係一粒效能相當強大的中階 U,放到 X20 Plus UD 身上,得出的成績又如何呢?版主就同大家極速跑一次安兔兔,睇下結果如何。▲ 安兔兔跑分有 143942 分,以中階機來說,呢個分數簡直拍得住 1、2 年前的旗艦機,算是不錯的表現,當中的 CPU 成績最高,有 67055 分,而 GPU 成績則有 30483,唔可以話好好,但玩 3D 遊戲都唔會話太差。
史上首部用屏下指紋黑科技!版主立即試玩!
呢部 Vivo X20 Plus UD,係全球首部用上屏下指紋技術的手機。係咪真係好實用呢?其實版主心入面果句係,如果呢個屏下指紋技術可以用在 iPhone X 上,會更有用。點解咁講呢,因為舊代的 X20 Plus,本身都有後置的指紋辨識鍵,而家雖然屏下指紋係叫做新技術,但放在 X20 Plus 來看,某程度上只係將指紋辨識由後面搬至前面,係有啲新鮮感嘅,但未至於話真係非常實用。當然,有啲網友會鍾意前置指紋多過後置指紋嘅,咁鍾意同唔鍾意呢家嘢,我又無得講啲咩。不過平心而論,用新技術屏下解鎖,的確係相當準確,但就可能比一般有實體指紋辨識鍵的手機,慢了少少。▲ 以上為屏下指紋解鎖的試玩片段。
Vivo X20 Plus UD 抵港在即,賣價搶先睇!
根據 Vivo 官方的透露,Vivo X20 Plus UD 將不會在香港上市,而會在香港上市、而又用到屏下指紋辨識技術的手機,應該會是 XPlay 7,預計在今年第二季 (即大約四、五月) 上市。不過,如果想搶先玩屏下指紋技術,呢部 X20 Plus UD 水貨預計將於明日或後日抵達旺角先達,第一水賣價為 $4480,呢個價網友又覺得是否可以接受呢?留言討論下啦!除了顏色、屏下指紋同埋有 128GB 之外,所有配置都跟 X20 Plus 一樣,按這裡可重溫一下 X20 Plus 規格配置及最新賣價。
查詢: 三禾電氣