6.28 吋 19:9 有 M 字額！Vivo X21 開箱
雖然是香港首部具備屏下指紋技術的手機，但 Vivo X21 賣到呢個價錢，又似乎貴咗少少。不過，質素同樣都好重要，賣 $4498 但可唔可以交得足貨呢？先同大家做個開箱評測再說。講到 Vivo X21 的包裝盒，個人覺得係幾靚嘅，因為 Vivo 係 2018 世界盃的贊助商，所以可以見到，盒面會有大大個世界盃的標誌。Vivo X21 具有 6.28 吋 19:9 芒，屏佔比高達 90.3%，左右邊框僅為 1.66mm，從正面來看，算是目前做得最靚的手機。機身係薄嘅，但版主不喜歡的，是機背微弧設計，雖然說是能夠提高手感，但主觀感覺不太美觀。
▲ Vivo X21 的包裝盒，因為 Vivo 係俄羅斯世界盃 2018 的贊助商，所以在包裝盒上亦順理成章見到有世界盃的標誌。
▲ 翻轉包裝盒背面，上方會見到有 X21 的重點功能，包括屏下指紋 (In-Display Fingerprint Scanning)、Dual Pixel、6GB / 128GB 以及臉部辨識。
▲ 香港版只有黑色一種顏色，其實個人比較失望的是，沒有另外兩隻色。白色同紅色，其實都幾靚，不過就可能市場比較窄啦。
▲ 有不少網友會關注，跟機會有乜嘢配件，我就覺得都幾齊嘅，除咗有 USB 線、充電火牛、卡針之外，仲有保護套以及 Vivo 原廠耳機。
▲ 跟機火牛支持最高 9V / 2A 共 18W 輸出。
▲ 來，我哋開始要見見真機。版主第一感覺係，個芒幾靚，可能同佢所講用上 P3 色彩管理技術有關吧。
▲ 如果不是 M 字瀏海額，也許會更加 perfect。不過都可以理解嘅，無咗個 M 字額，聽筒就話可以用骨傳導技術啫，但前置鏡頭又應該放邊個位呢？難道要學小米咁放下方？
▲ 用上圓角設計，下方「三天皇」鍵係可以收埋，變成手勢操控的。
▲ 機背見到用上 3D 玻璃材質，但版主摸上手覺得唔係太似玻璃的感覺，反倒覺得有少許像膠。另外，機背可以見到有直向雙鏡頭，中間部份會有 VIVO 的字樣。
▲ 機身右側會有開關鍵以及音量鍵，左側則是甚麼也沒有。
▲ 機頂會有 3.5mm 耳機孔。
▲ 而機底則有 USB 插槽、SIM 卡槽以及喇叭。
▲ SIM 卡槽依舊是用上三選二設計。
▲ 上手感覺其實唔差，手感幾好，又唔會好滑手。問題係我個人不太喜歡弧型的機背。
香港首部支持屏下指紋技術手機
雖然 Vivo X21 係香港推出、首部支持屏下指紋解鎖的手機，不過版主就不是第一次試玩這項功能，因為之前 Vivo X20 Plus 出屏下指紋版的時候，Vivo 香港已經率先俾傳媒試玩，感受一下屏下指紋解鎖。對版主而言，屏下指紋解鎖是挺有科技感的，尤其是當你解鎖果下動畫效果，又真係幾型下。科技感係夠，但解鎖速度就會比一般指紋解鎖慢咗大約半秒左右。當然，這就是要型的代價，但果半秒個人覺得係可以接受到的。
▲ 解鎖果下真係幾型架！同埋呢個動態效果係有得轉架，一共有三個效果可以選擇，但版主覺得 Default 呢個先係最型。
S660 AIE 處理器 + 6GB / 128GB！Vivo X21 效能速試
香港推出只有一個容量版本，就是 6GB RAM 以及 128GB ROM，一般使用真係好足夠。而處理器部份，Vivo X21 用上 Qualcomm S660 AIE 處理器，能夠透過整合多核心硬件資源支持 AI 人工智能運算，唔單止在遊戲的時候系統能夠自動調整處理器到最佳狀態，同時亦都可以根據遊戲需求合理優化記憶體空間。而根據安兔兔跑分軟件的結果，得分為 144043 分，是 S660 處理器合理的效能成績。
DualPixel + 支持 AI 美顏 / AI 逆光拍照！Vivo X21 相機實拍
▲ Vivo X21 具有 AI 逆光拍照功能，當 Vivo X21 偵測到逆光的環境，就會自動變成逆光 (HDR) 模式。
▲ 同時亦支持 AI 美顏，能夠自動根據環境光暗等不同的參數，幫你進行美顏。
主鏡頭實拍
▲ 在日拍表現，Vivo X21 成像尚算不錯，油畫化情況並不嚴重。
▲ 同時我會覺得，X21 的成像細緻度挺高，放大來看文字，每隻字都可以睇得好清楚。
▲ 不知你又喜歡 X21 的照片成像呢?
前置鏡頭實拍
▲ 呢兩張相都是用上 AI 美顏功能，影完出來又係咪靚仔咗呢？
▲ 順帶一提，Vivo X21 加入了 AR 萌拍功能。
小結
初步為 Vivo X21 進行了開箱，並簡單測試過 Vivo X21 的效能以及相機表現，給版主的感覺是，雖然是價錢略高，但起碼交得足貨，相機部份都有一定的質素。至於 X21 的重大賣點——屏下指紋，個人認為很有科技感，雖然會比一般指紋解鎖略慢，但仍在可接受的範圍之內。不過，相信最影響到網友入手的，應該是 X21 並沒有 NFC 功能，這是好重大的致命傷。假若未來 Vivo 手機加入埋 NFC 功能，相信吸引力會大大提高。不知網友又對於呢部 Vivo X21 有甚麼樣的評價呢？關於呢部手機，你又有無咩嘢想知？留言討論下啦！Vivo X21 在文章發表時，建議零售價為 $4498，按這裡有詳細規格及最新賣價。