一代「性價比之王」跌到唔使 $1000，好抵玩？
講嘅係 LeEco Le 1s。雖然呢部機在今年年頭先在香港上市，不過實際來說佢都算係 2015 的機種。當時 Le 1s 一推出，憑住超高性價比，確係帶俾網友無盡的幻想。以為出左 Le 2，Le 1s 就無得賣？其實 Le 1s 一直都在網絡商仲有得買，當中 SmarTone 應該係目前最平的入手方案，前排開始做緊「即減 $500」，只需 $999 就可以買到，仲包 SmarTone 免費爆芒換新，對比出面細舖，大概仲平多百幾二百蚊左右。入部做後備機，得閒用來睇下片，外型又靚過平時啲平價機，呢部 Le 1s 會是你的選擇嗎？
▲ 暫時似乎係得 SmarTone 先做咁平，而且仲有貨。出面細舖價都仲係要 $1180。
最平 Android Pay 手機？
一千蚊唔使、又值嘅後備機，不得不提的是 HTC Desire 530。呢部 Desire 530 雖然規格入門，不過佢有着大部份平價機都無、今日來說相當重要的 NFC 功能，應該仍然是目前最平價用到 Android Pay 的手機。Desire 530 而家要搵到都唔容易，CMHK 早前亦都已經以 $880 的價錢清貨，真係想入手的話，就要去細舖尋覓。而版主行場時留意到，Desire 530 目前最低賣價為 $998，呢個價錢買到部用到 Android Pay、足夠日常操作的手機，你又覺得超唔超值呢？
▲ HTC Desire 530 街邊細舖並唔係咁容易搵到，最平賣緊 $998，間間店舖賣價都會有差別，但一般都是 $1100 樓下。
$700 唔使！紅米 4A 又是否可以考慮？
不嬲紅米系列都係性價比高，但始終網友一提到大陸機，就好抗拒，有時候可能會忽略呢啲手機好嘅一面。講真，成日都話，幾百蚊貨仔，你想要部「曉飛」嘅手機咩？無可能囉！呢啲價錢，就唔能夠有過份要求，基本日常使用用到，做後備機其實真係好適合。而呢部紅米 4A，用上 S425 處理器，水貨賣價約 $680 左右，做後備機打出打入碌下 Facebook，又考唔考慮得過呢？不過如果嫌佢得 2GB + 16GB，咁亦都可以諗下紅米 3s，有 4100mAh 大電，而且最高內置 3GB + 32GB，最平都只係 $899 起，你又會點揀呢？
▲ 紅米 4A 配備 S425 處理器，內置 2GB RAM + 16GB ROM，深水埗細舖賣價約 $680 左右。
▲ 而紅米 3S 配備 S430 處理器，最高內置 3GB RAM 以及 32GB ROM，最平 $899 起。
Le 1s 在文章發表時，網絡商最平賣價為 $999，按這裡有詳細規格及最新賣價。
HTC Desire 530 在文章發表時，大舖已下架，按這裡有詳細規格及最新賣價。
紅米3S 在文章發表時，賣價為 $999，按這裡有詳細規格及最新賣價。