【場料】代理管得嚴　Sony VAIO P 冇得平

▲有賣 Sony VAIO VGN-P23 同 P25 的腦場舖頭已唔算多，9 成 9 仲係賣公價，想搵部平少少都難！


今年 2 月推出的超爆「插褲袋」Netbook Sony VAIO P 系列，到底好唔好賣，王大文唔敢講，只要大家問一問自己，有冇見過人用，答案就應該心有中數了。

事實 VAIO P 的頭炮 VGN-P13，早已絕跡腦場，6 月出的新款 VGN-P23 及 P25，都唔算有好多腦場舖頭賣。其實細舖唔賣，除了需求問題外，仲有另一原因，就係 Sony 的代理特別「惡」。雖然各大品牌 NB 的代理，都規定舖頭要依足定價賣機（因若然客人去晒細舖買機，大電器舖少了生意，又會向代理投訴），但多數只係「講下就算」，唯獨 Sony 規管得寧舍嚴厲，於是多數電腦舖的 VGN-P23 及 P25，都係賣番正價 $5,980 同 $8,480。亦有細舖老闆同我呻過：「咁鬼麻煩，留番畀大舖賣啦，我唔賣喇！」



▲反而冇得平，要買 Sony VAIO P 系列的話，不如去電器舖吧。