▲呢部$2,780 的 Mobin Netbook m.1，已安裝了《Windows XP Home》，但如果它因只安《Linux》而賣平幾百元，叫座力會大好多！
又多一個新 Netbook 牌子出現！早幾日王大文行旺角星際城市時，見到新開了一間 NB 專門店，店員聲稱有 12 個牌子的 Netbook 或 Notebook 出售，但最重點推銷的，始終是一部跟呢間舖差不多名的 Mobin Netbook m.1。
老老實實，呢部機真係零知名度，賣 $2,780 又唔算勁平，未打已輸俾其他機。睇番它的規格：10.2 吋芒、Atom N270 1.6GHz CPU、1GB RAM、160GB HDD，全部都係普通料，MSI 等二、三線牌子的同級機，賣呢個價、甚至比它平一、二百的大有機在，除了配備 6-cell 電這一點較為吸引外，實在冇乜賣點引人賣它。
但呢間舖話做緊新張優惠，凡購買指定 Netbook，就可以 $1 換購藍牙耳機，同埋買親 NB 都有多用途機袋送，呢兩點反而較有吸引力，想買 Samsung、MSI 等牌子 NB 的話，得閒都可以上去望一望。
▲呢間新開的電腦舖位於星際城市 1 樓，看舖內的宣傳品，佢應該同手機及藍牙耳機分銷商 MC.FOUNDER 有一定關係。
▲門口呢位仁兄不停向行人推銷 Mobin Netbook m.1，絕少 Sell 其他機，一看便知 m.1 是佢間舖自己的出品。