Lenovo 推出兩款娛樂用途筆電,超高清屏幕 + 三大遊戲專用配件!
|
Lenovo
Lenovo Yoga 900
Lenovo 的 Yoga 系列,特色在於能夠將屏幕向後翻轉,鍵盤墊底筆電當平板用,對於呢種設計的筆記型電腦,你有啲咩野看法呢? 上年 10 月的時候,Lenovo 發佈左 Yoga 系列的第三代產品 Yoga 3 Pro,當時的售價為 HK $13998,有網民認為這個價錢太貴了,「如果 1 萬,即買!」,無錯當時係有人咁講的。今日 Lenovo 推出左 Yoga 系列的第四代產品 Yoga 900,不知道 Lenovo 有沒有在價錢上作個調整呢?
Yoga 900 的機身尺吋為 324 x 225 x 14.9mm,採用了 13.3 吋超高清多點觸控 QHD+ 屏幕,解像度為 3200 x 1800 pixel,屏幕大小上比上一代大了 0.3 吋。另外,Yoga 900 比上一代重左又......厚左? 版主無打錯,可能係因為用左更大屏幕關係,所以佢嘅重量都比上一代略重,有 1.29 公斤,而厚度則為 14.9mm。不過雖然係咁,但呢部 Yoga 900 仍然都可以叫做輕巧的。Yoga 900 延續左 Yoga 3 Pro 嘅設計,獨特的錶帶式鉸鏈由 813 件獨立組件製成,造工上相當不錯,而且仲可以自由轉換筆電、直立、帳幕以及平板四種使用模式。
至於規格方面,Yoga 900 採用了 Intel Core i5 / i7 處理器,並配備了 8GB LPDDR3 RAM 以及 256GB SSD,圖像處理方面,Yoga 900 採用了 Intel HD Graphics 520,並設有 2 個 Type-A USB 3.0、1 個 Type-C USB 3.0、1 個 USB 2.0 配備 DC 輸入,總共 4 個 USB 插槽,應該對於大部人黎講都相當夠用。另外 Yoga 900 仲具備 4 合一讀卡器,支持 SD、SDHC、SDXC 以及 MMC。Yoga 900 亦配備左 2 個 JBL 立體聲喇叭,並採用了 Dolby 技術 DS 1.0。售價方面,Yoga 900 的建議零售價為 HK $11998 起。
▲ Yoga 900 配備了 13.3 吋 3200 x 1800 解像度 IPS 多點觸控式屏幕,比上一代大 0.3 吋。
▲ Yoga 900 採用了由 813 件獨立組件製成的錶帶式鉸鏈設計,能夠讓屏幕向後翻轉,反轉角度接近 360 度,實現四種使用模式,當中包括筆電模式、直立模式、帳幕模式以及平板模式。
▲ 機身重量只有 1.29 公斤,單手拎住都唔算太重。
▲ 機的右側有 3.5mm 耳機插槽、1 個 USB 槽以及開關鍵等。
▲ 而機的左側有 USB 2.0 配電源接口、1 個 Type-A USB 3.0、1 個 Type-C USB 3.0 以及 SD 讀卡器。
▲ 蓋上屏幕,見到 Yoga 900 採用了香檳金的顏色,左上角會有 YOGA 的字樣。
▲ Yoga 900 機背。
▲ Lenovo 的電腦鍵盤一向都比較好按,版主試過用佢打過字,感覺挺順暢。
Lenovo IdeaPad Y700
接着出場嘅係呢部擁有 15.6 吋 UHD IPS 屏幕 (3840 x 2160 解像度) 的重量級筆記型電腦 IdeaPad Y700。點解我話係重量級呢? 因為就咁望落去,部機真係好大部,拎埋上手,覺得都幾重下。IdeaPad Y700 的機身尺吋為 387 x 277 x 25.95mm,配備了 15.6 吋 1920 x 1080 / 3840 x 2160 解像度的 IPS 屏幕,重量達 2.6 kg,要拎出街的話未必咁方便,但在家打機作娛樂用途應該會相當不錯。
咁講到打機,除左要有一個又大又清晰的屏幕之外,佢嘅規格都好重要。Lenovo IdeaPad Y700 配備左第 6 代 Intel Core i7-6700HQ 四核心處理器,並內置最新的 8GB DDR4 / 16GB DDR4 RAM 以及 1TB HDD / 1TB HDD + 128GB SSD / 1TB HDD + 256GB SSD。圖像處理方面,Y700 採用了 nVidia GTX-960M 4GB GDDR5 顯示卡。Y700 配備了兩個 USB 3.0 插槽以及 1 個 USB 2.0 插槽,並支持 HDMI 輸出。音效方面對於打機嘅人黎講都幾重要,Lenovo 特別為呢部 Y700 加上 2 個 2W 的 JBL 喇叭以及 3.0W 的重低音喇叭,並支援 Dolby Home Theater,當你打機的時候,可以有一個好震憾的感覺。另外,IdeaPad Y700 採用了 AccuType 背光鍵盤,並具有兩種等級的亮度控制。售價方面,Y700 的建議零售價為 HK $10998 起。
▲ Y700 的正面圖,其實真係好大部。
▲ Y700 採用了 15.6 吋 UHD IPS 屏幕 (3840 x 2160 解像度) 。
▲ Y700 採用了 AccuType 背光鍵盤,就算係熄哂燈都可以清楚見到啲按鍵。而且好多時候啲人打機都會用到 W、A、S、D 呢四個按鍵,所以你會發現呢四個按鍵會比較突出明顯。
▲ 從呢個角度可以明顯看到鍵盤的亮度。
▲ Y700 的右側你可以見到有 2 個 USB 插槽以及 1 個 HDMI 輸出。
▲ 而機的右方你可以見到有充電位、1 個 USB 槽、讀卡器以及 3.5 mm 耳機插槽。
▲ 值得一提的是,Y700 具備了左右 2 個 JBL 喇叭,並支援 Dolby 技術。
▲ 蓋上屏幕,Y700 的機面是這個樣子的。
Y 系列專用配件
Lenovo 除左推出左呢兩部筆記型電腦之外,仲為機迷們帶來了 3 款遊戲專用的配件,當中包括 Lenovo Y Gaming 機械式開關鍵盤、環迴立體聲耳機 Microphone 以及精確滑鼠,售價分別為 HK $999、HK $599 以及 HK $499。
▲ Lenovo Y Gaming 機械式開關鍵盤,具備了 6 個可錄製程式的遊戲按鍵,並採用了完整按鍵矩陣 Anti-Ghosting 鍵盤機制。
▲ Lenovo 新推出的環迴立體聲耳機 microphone 能夠支援虛擬 7.1 環迴立體聲音色,配搭可分離式降噪 microphone,並設有背光功能,可進行 5 種等級的調整。
▲ Lenovo Y Gaming 精確滑鼠最高可達 8200 DPI,並搭配 4 個可自訂的設定以及 8 個可編程按鈕。
以下附上一張 Model 用 Y700 戴着專用滑鼠以及耳機打機的相片:
睇完以上版主為大家介紹的兩部筆記型電腦,會唔會考慮都入番部番屋企玩下呢? 不過對於版主呢啲窮鬼黎講,其實我覺得呢兩部機都好貴下。講番 Yoga 900,雖然今次 Yoga 900 的價錢相比上一代黎講睇落係平左,而且個芒都大左,仲用上了 Intel i 系列的處理器,不過上一代 Yoga 3 Pro 是配備了 512GB SSD 的,但今代最高只有 256GB,咁係咪真係平左,就要靠你自己去判斷喇! 而 Y700 其實我覺得呢部機對於平時中意打機嘅人黎講,真係幾正下,配合埋佢嘅遊戲專用配件,用佢黎打機應該可以有一個不錯的遊戲體驗。你對呢兩款機又有咩野睇法呢?