版主爆料:HKBN x TVB 有大件事!新 Plan 包全球數據 + 手機

左定坤 (Cho Ting Kwan) 2018-04-11 21:18 | 科技新知
大件事!有料爆!話說聽日 HKBN 就聯合 TVB 搞發佈會,似乎有重要事宣佈。之前收到邀請函,版主就已經在猜度,到底佢哋有乜攪作。同得 TVB 聯合,按常理推斷,應該好大機會同 myTV SUPER 有關。再仔細看邀請函尋找蛛絲馬跡,發現「出席及主禮管理層」名單之中,仲包括咗一間叫香港優克網絡技術有限公司 (唔知係咩公司,唔緊要,下文再講)。到底今次 HKBN 搞邊科呢?而就在發佈前一晚,版主就收到風,原來是這樣的一回事......出新 Plan,送全球數據 + 手機,而且唔算貴,似乎都幾有睇頭。欲知詳情,看下文啦!

HKBN(Facebook).jpg

同 GlocalMe Wi-Fi 蛋公司有關?

開始講有咩爆料之前,首先大家要了解一下,到底香港優克網絡技術有限公司 (英文叫 uCloudlink),係一間點樣的公司。其實原本版主都唔知係公司,但後來上佢哋官網搵過資料,發現原來呢間公司,係同著名 Wi-Fi 蛋公司 GlocalMe 有關,準確點地說,優克網絡就是 GlocalMe 的母公司。

之前 HKBN 就出過一個新 offer - 上台送 10 日 GlocalMe G3 Pocket Wi-Fi,可供用戶在全球各地上網。因為有呢個「前科」,所以 HKBN 今次聯合 TVB 搞發佈會,不難估計係同漫遊 + myTV SUPER 有關,原本猜測可能出個新 Plan,租 HKBN Wi-Fi 蛋全球任睇 myTV SUPER 之類,不過結果原來係......

maxresdefault.jpg

$218 月費,包 5GB 全球數據,再送 GlocalMe 手機

版主收到風,HKBN 聽日會出一個新 Plan,月費 $218 送價值 $2500 的 GlocalMe 手機一部,扣除機價每個月約 $114,仲包 10GB 數據,當中有 5GB 係 for 本地用的,而另外果 5GB,則是 for 全球 65 個國家用的。唔單止係咁,如果登記仲送埋 24 個月 MyTV anywhere 應用程式,可以全球都睇到 TVB 節目。不過係咪咁正,就見仁見智,好似版主平時都好少睇電視,點會無啦啦去到外國特登睇 TVB 節目呢?咁呢個優惠對我來說,或者就作用不大了。

至於上面提及GlocalMe 手機係乜嚟?其實你可以當佢係有通訊功能的 Wi-Fi 蛋,呢部手機在今年 MWC 大會都出現過,透過專利 Cloud SIM 技術,毋須更換 SIM 卡或者啟動漫遊數據,都可以在全球各地使用數據,而且仲會自動幫你連接當地的最佳網絡,唔使 set APN,去到當地直接用。再說,平時去旅行,Wi-Fi 蛋又要租,又要還,好麻煩,而家 HKBN 上台送埋俾你,係咪又會方便好多呢?

batch_resize_IMG_6576.jpg
圖片來源:MashDigi。要注意的是,GlocalMe 手機最多只可同時支援 5 部裝置連線。
 

最新新聞