多字正文
其實，本 YK 近年都已放棄了中國的網購平台，皆因自己都曾經中過伏：產品質量差、官方出錯卻死不退款、運輸時間難以估計等等。而今次挑選分享的其中兩位比較離譜的個案，我相信以中國近代偉大的成就，肯肯定只係 14 億人中的個別例子，只係佢地唔好彩咋！ 但我都樂意將特殊個案寫出黎警世 ~ 哈哈 ~ （以下截圖會遮蔽部分資料）
▲ 網友 A 君自覺聰明，在 10 月尾分別於不同的天貓網店購入了耳機、充電線、手機套，認為能夠避開過往「雙 11」的物流大混亂的情況； 貨品亦在 11 月 2 日於官方集運倉出貨，並完成中國口岸的報關手續。
▲ 到了 11 月 5 日，物流狀態一路無更新，所以 A 君找了線上客服人員查問狀態；其實 A 君也是淘寶老手，知道直接寫「轉人工」就會有真人客服出現。
▲ 客服話無辦法立刻查閱資料，叫 A 君留一個電郵地址等通知；本 YK 已經聞到好大陣伏味 ~
▲ 11 月 7 日仍未收到任何回覆，A 君又找客服了。
▲ 對話中間 A 君都忍不住開火，因為同期購買的另一個包裹已經送到香港；官方客服承諾如果等多一日都無消息，可以申請退款。
結果，11 月 8 日一如所料無消息，所以 A 君又搵客服全力開火！ 中間好多令人打冷震的說話我就唔 CAP 出黎喇，總之就係每隔兩日 A 君就問一次，每次阿里巴巴官方都係有各種解釋，包括但不限於：「跟進中」、「索取倉庫交接清單」、「海關清關中」等等。 咪住！ 一開始唔係已經話完成報關嗎？
無論如何 A 君依然只有「三無」回覆：無法知道貨物何時發出、無法知道海關為何完成報關後又要清關、無法獲得肯定答覆可以退回全額貨款和運費。如是者一路來來回回玩到 11 月 23 日，事情終於有轉機！
▲ 終於有一個客服願意講出有進展的說話：貨被海關扣押！ 咁到底係乜貨出問題被扣押呢？
▲ 在云云眾多充電線、電源轉插頭等貨品中，對講機耳機線被客服說成是可能導致被扣押的原因：電子配件。
黎到呢度，連本 YK 都覺得好 X 煩，拖成個月但最後比個理由係海關扣貨。好喇，咁我叫 A 君去申請退款，起碼錢翻黎先。點知又有花生，11 月 24 日搞退款的客服回覆話不允許退款，最多只能退運費，貨款不能退。
▲ 客服仲話貨物在海關清關中，請耐心等候送貨 ~
黎到呢度 A 君當然再無辦法忍受，直接開始問候客服家人身心安康喇！ 結果，在 11 月 25 日某個聲稱係阿里巴巴官方客服（3 字頭香港號碼）打黎話願意退款。 但原來所謂的退款係退落去「紅包」度，並非原路退款，姐係呢筆所謂的退款，你只能再次用在阿里巴巴的網購平台上。 原本 A 君話難以接受，呢種做法等於你在大型電器店鋪買了一個雪櫃，結果雪櫃一個月都未送到貨，你話要退款但收到的卻係電器店的代用卷。。。
但本 YK 本著慈悲為懷的心態，勸勉 A 君要包容特殊情況，「紅包」一樣袋住先。 而到呢一刻 A 君的事情歷時一個月終於落幕。 但熟悉海關運作的本 YK 可以告訴大家，其實阿里巴巴官方有承諾 3 個工作天內送到貨、有晒超期賠償方案，但如果客服同你講係海關原因（呢個理由你無得證實，任佢吹的），所有承諾自動作廢。
另一位苦主 B 君遇到的情況係「淘寶官方呃稱 / 呃重量」，也就是貨品不足半公斤，亦當你超過一公斤計算！
網友 B 君就睇中雙 11 購物優惠，所以在雙 11 凌晨就光速採購了一堆貨品，然後付款等收貨。 果然，這個貨隔了 10 天就送到！ 但 B 君好無聊，突然發現了官方的過磅報值有古怪。
▲ 本人非常好奇阿里巴巴集運倉的磅係咪「古惑的磅」，一件正常一件輕巧，可以來回交替咁出重量數值；一個平板套的重量跟手提肌肉按摩機相若，學 B 君話齋得兩個可能：部按摩機係假的、得個殼，或者個套係金屬造。
▲ 遇到官方集運倉呃秤，當然 B 君直接去搵阿里巴巴客服投訴，申請要求退款；又提交晒過磅圖片、訂單資料等。
▲ 結果，第一次申請失敗！ 原來相片要露出埋應該露出的四角 + 面單，所以 B 君重新搞多次。
投訴結果係點？ 結果係搞了好幾次都話圖片唔符合要求，最後 B 君好似放棄了，而本 YK 都唔敢多問，因為每次想問都會怕控制唔到自己大笑 ~
結論：
我相信各位網友都會同我一樣相信上述只係個別例子，點會成日出現「貨品就 20 蚊、運費就收你 50 蚊」的呃秤事件呢？不過，最近確實多了不少網友向本 YK 訴苦，原來扔爛貨品 NOT BIG DEAL ~ 本 YK 事後都同 A 君 B 君講，貪果少少價錢的優勢，最終損失的卻是大量時間和精神，真正「來回地獄又折返」~
題外話：有無其他網友又遇過神奇的網購經歷？ 不妨留言一齊分享下啦 ~