香港中文大學今日 (4/11) 舉行了一場與 Google 執行主席 Eric Schmidt 的交流會，主題是「與世界接軌：推動年輕創業家勇闖新數碼時代」。呢個題目，可以好嚴肅，但同樣地可以好沉悶。為了等網友容易點消化，我今打算用比較有趣的寫法，表達小弟對今次 Eric Schmidt 交流會的感想，事先聲明，本文並非正規新聞，純粹個人採訪手記，XD ~
還是要說一句，很高興有機會能代表 ePrice.HK 出席這次交流會。
中大開場 幫助創業
老老實實，我一開始聽到可以真人見到 Google 大人物，真係成晚無訓，打機打到難以入睡。全球最強大的公司 Google，加上聽聞個交流會係講 IT 創業，我當然早早到場。事實上，我好想聽下 Google 主席，到底有咩法寶，可以打救香港垂死不景的 IT 行業。
▲ 交流會係香港中文大學舉行，馬料水咁遠，但人群一樣準時 1030 蒲頭，好多人呀
▲ 逼到入會場都無用，Eric Schmidt 主席塞車緣故延遲半小時先開始，證明真係唔好揸車入中大。
▲ Eric Schmidt 一到場，循例發表短講，心水清的網友們當然估到內容不外乎 Google 點樣點樣、中大點樣點樣。當然少不了中大沈校長的歡迎辭。
▲ 入正題啦
Eric Schmidt 主席風格趣怪，表現親民，每每引得全場笑聲。
▲ 大會邀請左四個本地青年創業才俊，可惜小弟孤陋寡聞，全部叫唔出名，除左陳易希。
▲ 連接世界，不少外國同學都出席交流會，專心聽書。Eric Schmidt 來香港做乜呢？ 原來佢跟中文大學，搞左個合作計畫，計畫幫香港本地的年輕創業家，包括與經驗導師交流、安排到訪 Google 總部、協助創業家克服起步困難。聽落都好吸引。 唔知我有無機會呢?
重振港創意工業？ 港府成攔路虎！
睇完花桇，入重點了！就是 Eric Schmidt 對香港創意工業的睇法。Eric Schmidt 話好多創業者初期，會擔心公司好細做唔大。他叫大家唔好驚，eBay 同 Paypal 的經驗話俾我地知，公司成長起黎好快。但佢提醒，如果創業想有資金來源，就要說服到人地，自己的產品比別人好。同埋唔好自己一個人打江山，叫埋一班巴打一齊，要有「團隊合作」精先，先會事半功倍。
其中最有話題性的問題，問到政府點樣幫到香港創業人士， Eric Schmidt 好本事，無直接回應問題，但講左一個爆點：｢一個政府的資產應該係人民同埋創意。」講到呢度，我眼睛有少少滾動，我對眼瞪到大一大，唔係掛。我好同意主席呢翻驚世名句，但呢句話應該話比 CY 特首聽。 Eric Schmidt 又勾起我香港電視的傷心回憶，令我不禁撫心問天，香港政府家陣的思維，香港創業者，應該點算好呢？
▲ 交流會不設記者提問，會後採訪都不接受。我仲想問下點解無得係 Google Play 直接買 Nexus 裝置，都問唔到..
港 IT 、創意、創業一片悲...
我係呢度分享下自已的經驗。我 YK 是一名大學生，大學聯招最後放棄讀 IT，我跟很多從事 IT 業的網友們都會有一種無奈感。我見不少朋友做 IT 都話好辛苦、又難識女仔 ，SOSAD ~ 想到這裡，耳邊突然響起 Eric Schmidt 的聲音，主席話將來不排除係香港搞更多幫助 IT 業的活動、提供更多機會。老老實實，香港政府唔提供一個良好創業環境，企業點做、創業家點勁都無用啦。 HKTV 就係一個創意工業被扼殺的例子。Eric Schmidt 會上都坦白講，香港目前好少軟件配合，發展起來比較困難。
網友們又點睇香港創業，同埋 IT 業的未來？一齊分享一下？