案發現場
故事相當簡單，網友 H 幾日前匯款港幣 50 萬元到新開立的螞蟻銀行（香港）戶口，希望享用高息活期存款利息。 但幾日後想將部分資金，轉移到其他本地銀行預備抽新股之用，但發現每日最高轉賬額度只能輸入港幣 20 萬元，無法再提升額度，所以就直接提交轉賬指示，一次性港幣 20 萬元到其他銀行的同名戶口，也是網友 H 本人名下的戶口。但與過往匯款的體驗不同，幾分鐘後目標帳號依然收不到款，網友登入螞蟻銀行（香港）查看才發現款項靜悄悄地被系統扣住，一直顯示處理中。 網友 H 深感不妙，畢竟匯款兵貴神速，錢被扣住又無人主動通知佢發生乜事，所以第一時間找本 YK 求助。而我係無野可以做，只能叫佢打電話聯絡螞蟻銀行（香港）的客戶服務員，我再透過另一個電話旁聽，從旁協助理解事情進度。
可能係新營業的銀行的緣故，螞蟻銀行（香港）的客服職員都無辦法講出到底發生乜事，只係話會調查下情況，亦未能回覆到底何時可以解凍有關資金。 網友 H 亦問職員到底需要提交什麼文件解凍？ 或者可否沿路退回、取消匯款指示？ 但對方一概無法回答，只係著網友 H 掛線等候調查回覆。 呢個時候我提醒網友 H 好爆 SEED 喇，並提出要求高級職員回電，多翻來回抽擊下職員表示留下聯絡方式，主管忙碌完會回電。 再逼多一逼才話半小時內有人回覆。
呢度等我加把口先：如果我抽新股要等你半個鐘就死 X 得喇，扣住錢唔出唔入咁玩野咩！
過左一陣，主管登場！ 主管果然辦事效率高，一接通電話後就要求核對網友 H 的所有個人資料（但忘記左提供自己的員工編號做記錄核查），然後就話會立刻做解凍操作。有趣的是，網友 H 繼續追問是什麼原因，是否懷疑佢洗黑錢，主管支吾以對話可能係（原來轉翻 20 萬比自己其他戶口都可以洗到黑錢，嘻嘻），然後話呢次係屬於銀行內部隨機抽查，確保匯款的細節正常。係出事後 40 分鐘，終於釐清疑團、錢到目的地。
▲ 銀行主管回電後，網友 H 提供即時截圖顯示：從 11點 07 分提交匯款指示，到 11 點 47 分依然「處理中」，20 萬元款項被銀行凍結中。
▲ 在網友即時主動致電查詢的情況下，屬於他的 20 萬元也要在 40 分鐘後才從螞蟻銀行（香港）戶口，匯回自己名下另一個銀行的戶口。（奇怪係 SMS 依然顯示話 11 點 07 分成個轉賬，本 YK 笑了~）
事後報告
銀行服務最重要係可靠，而且快速 + 準確解決客戶遇到的問題。 本 YK 就覺得螞蟻銀行（香港）算係咁，畢竟是屬於新開業的銀行，你睇埋隔離個銀行連月結單都會出錯。 唔知道下一次螞蟻銀行（香港）客戶遇到同樣凍結資金的情況下，睇下有無職員主動跟進？ 需要幾耐時間先收到錢？但有一個更重要的伏值得大家留意，各虛擬銀行的轉賬限制不同，有大有細，而且同傳統銀行的手機服務都有明顯差距。 以前你能習慣幾百萬的轉賬，但在 VBs 的世界裡面暫時只能用十萬做計算單位。本 YK 都順便提供埋常見 VBs 的額度比大家參考下，免得臨時要用錢轉唔出就 GG 了~
▲ 眾安銀行 ZA Bank 跨行匯款給同名帳號係單日最高 100 萬元，非同名戶口係 30 萬元。
▲ MOX 銀行單日最高轉賬 25 萬元，注意額度需要同繳費付款攤分。
▲ 匯立銀行 Welab Bank 每日最高額度係 50 萬元。
▲ 事先登記確認的戶口額度 100 萬，未有登記的戶口係 10 萬。
總結
問題最終得以解決係好事黎。 突然扣住客戶資金固然係嚇死人，但匯 20 萬咁少錢比自己都話懷疑洗黑錢？ 實在係笑死人。網友 H 事後都話「怕怕無下次」，亦唔打算再加碼入翻錢落去，佢覺得既然虛擬銀行主打輕裝無分行、低門檻易開戶，無理由轉個錢比自己都會卡住卡住咁。我唯有安撫佢話：你既然用得螞蟻銀行（香港）就預左架啦，新開業的虛擬銀行要包容下，政府叫你共融互愛、建立多元包容社會呀，好似係。
但網友 H 堅持呢次事件係個別銀行的問題，會繼續用其他虛擬銀行攞著數。 但本 YK 話「著數能使鬼推磨」，萬一螞蟻銀行（香港）出到 2% p.a. 活期，我睇死佢又會轉翻錢落去，哈哈~