唔少藝人都有買 NFT，或者你會話，都唔關我事，我又唔識，更加無錢。杜汶澤真係勁，佢唔買入名牌，索性推出自家 NFT。佢開晒 Page 等你買之餘，仲將今年「元宇宙」其中一個 Concept「DAO」結合埋 NFT 裡面。由 DAO 又 NFT，我真係唔識！唔駛怕，ePrice 話你知。
喱騷 NFT
NFT 係乜？可以好簡單講係乜，又可以好詳細咁講。之前，Daniel 訪問咗香港本土另一個 NFT Project：HolyShxxt，裡面都解釋咗好多，今次唔再多講啦。而杜汶澤今次出嘅 NFT，同出面攪開嘅 Project 都差不多。係「喱騷」嘅 newsletter，佢咁寫：「為咗慶祝「喱騷」一週年呢件事，我哋決定推出10,000 NFT並成立「喱 DAO」...「喱 DAO」(NFT) 喺一隻青蛙，每隻青蛙都會有不同的 Gear 同背景，獨一無二，以 NFT 形式記載喺區塊鏈。
用人話嚟講，杜生會用「喱DAO」名義，推出 10,000 隻 NFT，以Profile Pic 方式呈現，大約會係一隻青蛙咁嘅樣。而根據杜生官方網站顥示，似乎每隻 NFT 要 0.26 ETH，以撰寫本文時，一個 ETH = HK$24,920 計算，即係杜生嘅NFT，每隻大約賣 HK$6,479.2，當然未計「手續費」Gas fee 等啦。
跟一般 NFT 一樣，杜生嘅 「喱DAO」NFT，都係圍內人先買，乜嘢係圍內人？佢話喱騷 VIP 會員可以優先喺 19/1/2022 購買」之後先係公開發售，而根據一般 NFT 做法，如我哋之前介紹嘅 HolyShxxt 公開開發售都會比 VIP 認購為貴。咁乜叫喱騷 VIP 會員? 《喱騷》VIP 會員，即係佢哋年費會員，根據佢哋網站，年費 HK$800，即係你仲未課金俾杜生，又想買佢嘅 NFT，即課 HK$800 做入場門劵吧！
乜叫做DAO
咁又乜嘢叫「喱DAO」？因為杜先生姓杜？其實 DAO 呢個 Concept 又係今年大熱。DAO 其實係 Decentralized Autonomous Organization 縮寫，中文叫分散式自治組織，香港話可以叫「無大台組織」。無大台，即係人人都有話事權。而杜汶澤係佢嘅 newsletter 係咁寫：「喱DAO」個老闆唔只係杜汶澤，仲有你。所有「喱DAO」持有者，都有權去決定「喱DAO」嘅未來，甚至決定公司上下所有人，包括CEO杜汶澤嘅未來。「喱DAO」第一個目標，會喺元宇宙—— 一個虛擬世界，投資買一塊地！再起一間屬於我哋嘅Genius Bar，持有「喱DAO」NFT，你就可以隨時入嚟，同自己人傾下計、識吓朋友，仲有權報名參加 Chapman To’s Private night ，同CEO喺元宇宙一齊飲酒吹水！除咗開 Genius Bar，你仲可以參與我哋嘅決策，以及之後公司所有嘅產品，包括電影門票、台灣食品都會有優先購買權同優惠，好多好多你想做嘅嘢，都可以通過「喱DAO」投票決定。
推晒元宇宙玩意，係咪之後大家要用頭罩係 Virtual World 玩交友？定係用六千幾蚊買雙超級 VIP? 連杜汶澤嘅未來你都有份決澤，有無人玩嘢炒鬼咗佢？或者大家會唸，又有香港明星攪大型 NFT Project，係咪真係賺到錢？大家又會唔會參予其中嗎？
▲ 上圖大約「喱DAO」NFT 嘅草圖，若果大家對杜生嘅「喱DAO」NFT 有興趣？可以 Click 呢度留意更多。