經過一年發展,目前 Steam 上支援 HTC Vive 嘅遊戲已高達 1400 隻遊戲,雖然都有開發過不少好玩嘅遊戲(可以睇下上年嘅文章),大多數都係用最標準嘅配備(手製同有線頭罩),而走到 2017 年 HTC Vive 已經進化左,令 VIVE 更加方便、好玩,今次小弟有幸試過,借呢個機會跟大家分享下。
Vive Tpcast
▲ 呢個係一個無線嘅套件,只要放上 VIVE 嘅頭頂就可以無線方式玩 VIVE,有時玩槍戰遊戲郁得多就會俾條線影響住,家陣只需要 Tpcast 就可以無呢個煩惱。 Tpcast 嘅 delay 會少於 2ms 及支援 90fps,呢個數字拎黎打機係絕對合格,不過目前仲處於測試嘅狀態,官方表示會喺今年第二季推出,用家們可以等待下。
Vive Deluxe Audio Strap
▲ 從個名就知呢個就係 HTC VIVE 專屬耳機,就住用緊 VIVE 嘅用家頭形設計,可是對我而言只係過往玩 VIVE 由有線耳機變成左一個無線耳機。不過 Deluxe Audio Strap 未必係唯一嘅產品,只要我有一個頭戴式無線耳機都可以做到類似嘅作用,加上不少遊戲用家傾向用自己個人耳機為主,作用不大。不過代表左 HTC VIVE 設計開始有線走向無線。
Vive Tracker
▲ 唔好睇少佢外型細細粒,有左佢成個 VR 世界多左好多野玩,呢個 Tracker 就等同 VIVE 入面嘅手制一樣,只係佢可以唔洗好似手掣嘅形態存在喺系統入面,拎黎套用喺唔同嘅物件上面,例如玩槍戰就套落支槍到、棒球就係支棒到,甚至可以放喺隻手到添,將成個人套落 VR 世界入面。使用 Tracker 可以容易地開發到不同 VIVE 玩法,當中包括不同嘅運動遊戲,真實度高過當年任天堂推出嘅 Wii,更有人開發用作消防訓練,令到受訓者可以喺無火安全嘅環境下接受高危訓練。
▲ 呢個就係消防訓練示範片段
▲ 拎黎打機會點樣呢 ? 呢個係一支裝有 VIVE Tracker 名叫 PP Gun 嘅槍,更加貼近真槍嘅手感,同埋有摩打模擬槍嘅後座力,拎黎打槍戰 Game 就會更爽嘅感覺,如果未來有開發者開發到 CS VR 版應該會將槍戰嘅趣味發揮到淋漓盡致,而圖中玩緊嘅係支援 PP Gun 槍戰遊戲《Metal Assault》。
軟件發展
▲ 喺遊戲硬件上有發展之時,軟件則有一定程度嘅發展,日後 HTC Vive 除左可以喺 Steam 下載到 VR 遊戲之後,都可以喺 VIVE Port 下載,而且 Vive Port 仲有其他種類嘅 VR Apps 可供使用,將 VR 技術應用在不同地方。目前香港還未推出 VIVE Port,但據了解,未來推出嗰陣,將會和美國一樣使用月費計劃,價錢也差不多,而且也有商用版本。
另外最大嘅突破就係推出左 Multi Player 嘅功能,玩 VR Game 終於唔洗一支公單人喺到玩,打機唔上網打的確少左好多趣味,要同下朋友大家打打殺殺先係打機最開心嘅事。
▲ 呢個就係 HTC Vive HK 嘅 Toma 同 Eric 示範 Muti Player 玩 HTC Vive 遊戲《Arizona sunshine》
▲ HTC VIVE 已經有 Apps 可以充當科學書,將細胞放在 VR 上。
▲ 想行山 ? 有 HTC VIVE 就得。不過,若果你當行山係一種運動,用 VIVE 當然無咁好,只係想體驗風景嘅話,絕對可以嘅。
小結:
HTC VIVE 對我黎講,佢喺 VR 界別上的確係頂尖嘅享受,開始已經不只在遊戲層面上發展,選擇在多方面上嘅發展,目前 VR 環境還是一個小孩在成長中,到底成敗得失還是未知知數,只知道嘅係來到 2017年,各大廠商都想加入 VR 世界,上個星期 LG 就已經加入左呢個世界競爭。雖然目前 HTC VIVE 即使有最好嘅體驗,面對住 PlayStation VR 低廉嘅成本好似無咩還擊嘅招數,可能要等嘅係高效嘅 CPU 同 GPU 製造成本下降先可能吸引到用家入手,不過到底要用幾耐嘅時間?望嘅係呢幾年 VR 世界會有一個良好嘅競爭。更多 VR 試玩:
HTC VIVE 超乎想像咁好玩! 實習生 Wilson 多角度體驗真. VR試玩 Sony Playstation VR | 跟 HTC VIVE 比拼