自動下載 Windows 10 更新檔,是福還是禍?

左定坤 (Cho Ting Kwan) 2015-09-14 15:37 | 作業系統
Windows 10 喺 7 月 29 日已經正式推出,不過因為好多人都會覺得,啱啱推出仲有好多軟件未相容到,或者可能會有好多問題存在,所以唔少人都無諗住咁快就升級,依然繼續用舊有的 Windows 7 或者 Windows 8。但最近開始陸續有人反映,就算無預約或者無申請話要升級做 Windows 10,部電腦都會自動出現 Windows 10 嘅更新檔案,到底當中涉及到咩嘢玄機呢? 我哋一齊睇下!

//timgm.eprice.com.hk/hk/nb/img/2015-09/14/24145/prince1025_1_17_d2eaff3acc68bdc933032c8211610bb1.jpg

最近有外國網友指出,明明自己都無預約到要更新 Windows 10,無啦啦喺 C Drive 度多左一個名為「$Windows.BT」嘅隱藏資料夾,所佔空間介於 3.5 GB 至 6 GB 之間,後來發現原來佢就係 Windows 10 嘅更新檔。咁意味住啲咩呢? 咁即係話,就算你無諗住要升級 Windows 10,但只要你符合免費升級嘅資格,系統都會偷偷地自動同你下載 Windows 10 更新檔。

//timgm.eprice.com.hk/hk/nb/img/2015-09/14/24145/prince1025_1_17_1fc4be85d294d66456c7f640d90b1ea2.png
▲ C Drive 會無啦啦出現左一個 $Windows.BT 嘅隱藏資料夾。

//timgm.eprice.com.hk/hk/nb/img/2015-09/14/24145/prince1025_1_17_1706adbcbfe64b9155dd7302239dfc85.png
 ▲ 所佔空間介乎 3.5 GB 至 6 GB 之間。

據了解只要你安裝過 Microsoft update KB3035583 更新檔之後,就有機會會出現自動下載 Windows 10 嘅問題。而官方並無否認系統會自動下載 Windows 10 更新檔,微軟指出,只要有開啟 Windows update 自動接收更新嘅使用者,系統先會自動下載升級 Windows 10 所需嘅檔案。而自動下載嘅目的,係希望使用者如果忽然改變心意想升級做 Windows 10,咁就可以方便即時進行升級程序,而唔洗再慢慢下載更新檔。

嘩! 聽落微軟好似都幾貼心喎! 不過咁,因為系統自動下載 Windows 10 更新檔嘅時候唔會有事先提醒,所以如果你唔係用緊無限上網嘅話呢,就有機會有額外嘅上網收費。如果真係咁嘅話,邊個應該負責任呢? 再者,呢個更新檔可能會有 6 GB 咁大,如果使用者本身係用緊 Windows 平板,咁就可能會出現儲存空間不足嘅問題。所以話,微軟所講嘅自動下載更新檔,到底真係方便到使用者,還是令到使用者更加不便呢? 呢個問題真係要你自己先知!

順帶一提,如果你唔想接收到 Windows 10 嘅更新檔嘅話呢,咁就要記得將 Windows update 自動接收更新關左佢。如果你覺得部電腦儲存空間突然唔夠用,有可能系統已經自動下載左 Windows 10 嘅更新檔。要將佢完全刪除嘅話,你可以參考一下外國網站 Addictive Tips 嘅相關教學內容。



 

最新新聞