定位遊戲平板!10.5 吋芒 + 7500 大電!酷比魔方 X Game 行貨 $1800 有找

左定坤 (Cho Ting Kwan) 2022-01-06 21:14 | 網絡消息
遊戲手機就聽得多,遊戲平板就比較少聽,仲要只係買千幾蚊,而且仲要有行貨,真係諗都冇諗過。早前就同大家分享過,豐澤多咗好多國產平板,例如馳為、酷比魔方等等,當中嘅酷比魔方會喺今個月中,在香港推出一部新平板,定位為遊戲平板,賣家 $1800 有找,連個名都叫 X Game,以「遊戲」嘅英文命名,到底呢部嘢又咩料子,睇吓文啦!

酷比魔方 X Game 遊戲平板,會喺 2022 年 1 月 8 日於豐澤開賣,建議零售價為 $1799,確實上市日期未知。叫得做遊戲平板,性能理論上應該唔差得去邊,但賣價只係千幾蚊,仲要行貨有一年保養,聽落好似性價比好高,唔知大家又有冇興趣呢?

規格方面,X Game 採用咗 10.5 吋大屏幕,解像度為 1920 x 1080,配備 MTK Helio P90 處理器,安兔兔跑分成績大約係 Qualcomm S670 同 S710 之間,內置 8GB RAM 以及 128GB ROM,電池容量有 7500mAh。相機方面支持 800 萬像素主鏡頭,前置鏡頭則為 500 萬像素。

另外,平板預載 Android 11 系統,支持三選二 SIM 卡槽以及 4G 網絡,具有四喇叭,有需要時可以另外加購 4096 級壓感手寫筆以及磁吸式鍵盤,唔單止係一部主打娛樂嘅平板,而且仲可以變身成為文書用或者繪圖用嘅工具。不過,手寫筆同埋鍵盤香港會唔會賣,同埋賣幾錢,暫時就未有消息。

(7/1 Update: 呢款平板豐澤已提早上架,手寫筆建議零售價為 $199,而鍵盤建議零售價則為 $299)
 

最新新聞