Linksys Pinnacle 2.0 抵港　網上行獨家開售　主打唔使 App 都管理到 WiFi 7

左定坤 (Cho Ting Kwan) 2026-06-25 16:03 | 科技新知

Linksys 宣布同網上行合作，正式喺香港推出全新 Linksys Pinnacle 2.0 Mesh WiFi 7 系統，並由網上行獨家發售。今次亦係 Pinnacle WiFi 7 首次進軍亞洲市場，最大特色係將私隱放喺產品設計核心，用家唔使建立帳戶、唔使下載 App，都可以完成設定同管理屋企網絡。

LinksysNOW 瀏覽器管理平台

而家好多路由器都需要配合流動 App 使用，但 Pinnacle 2.0 就改用 LinksysNOW 瀏覽器管理平台，只要透過任何瀏覽器登入，就可以管理 WiFi 設定、檢查網絡狀態或者新增 Mesh 節點，唔需要將資料交俾雲端帳戶，亦唔需要安裝額外軟件。

一鍵功能

產品加入幾項一鍵功能，包括 Instant-Pair，可以快速加入新 Mesh 節點；Instant-Safety 可以阻擋成人內容、非法網站同已知惡意網站，令小朋友上網更加安心；Instant-Privacy 就可以限制新裝置加入 WiFi，避免陌生裝置接入屋企網絡。

硬件配置

硬件方面，Pinnacle 2.0 採用雙頻 WiFi 7（BE5000），官方表示理論最高速度比 WiFi 6 提升最多 1.8 倍，可以應付 4K 串流、雲端遊戲、大型檔案傳輸同多人同時上網等需要。每個 Mesh 節點覆蓋面積最高約 200 平方米，配合 Mesh 漫遊技術，裝置喺屋企唔同位置都可以自動切換至最佳訊號。至於網絡接口方面，新機配備一個 2.5GbE WAN 同三個 2.5GbE LAN，方便配合 Multi-Gigabit 光纖寬頻使用。另外亦改用 USB-C 供電，安裝位置更加靈活，閒置時仲會自動進入低耗電模式，減少能源消耗。Linksys 強調，Pinnacle 2.0 唔會追蹤用家瀏覽活動，唔會利用資料作廣告用途，亦唔會收集數據去訓練 AI 模型，希望令家居網絡管理更加透明，同時提升私隱保障。

其他新品及優惠

除咗 Pinnacle 2.0，網上行亦同步推出旗艦級 Linksys Velop Pro 7 10G。新型號採用三頻 WiFi 7 設計，加入 10 Gigabit 網絡埠，適合配合 Multi-Gigabit 光纖寬頻，應付高畫質串流、雲端服務、網上遊戲同智能家居等高流量應用。配合產品推出，網上行由即日起至 2026 年 8 月 31 日提供限時優惠。指定客戶可以每月 $88 元升級至 2500M 家居寬頻連 Linksys Pinnacle 2.0（1 件裝）；如果選擇 Linksys Velop Pro 7 10G（2 件裝），優惠月費則為 $168 元。