▲ 吊起 「路姆西」! 齊齊賀新年!
[SEP]
▲ 維多利亞公園年宵，中午時份，已經人山人海。
年宵爆趣 001： 羊年定馬年？維園遍地草泥馬！
入到場，其實版主都搞唔清楚今年係羊年定係馬年，因為今年攤檔好多都係賣草泥馬（羊駝）既公仔。人地其實係駱駝科架
，唔好「指羊為馬」先得架。不過咁，如果馬年賣唔晒啲公仔囉，咪留番羊年再賣囉，係咪先？
▲其實草泥馬咪仲可愛過馬
$168 起。
▲年宵入面草泥馬、長頸鹿仲多過真正既馬公仔，馬年都唔可以威番一次，其實都幾慘
每隻賣 $198。年宵爆趣 002：手機 Apps 、公仔實體化！ P&D 、 Candy Crush 咕臣！
當手機愈來愈普及，身邊朋友一個又一個變晒低頭族，今年你地玩得最多既手機遊戲係邊隻先？ P&D 定係 Candy Crush? 維園年宵有幾檔就係將 P&D 入面既「珠」同埋 Candy Crush 既糖果做成咕臣，最平 $68 有交易！另外亦唔少檔攤有賣 Line 既公仔，其實係出面商場都買到，行年宵買呢個好似唔多吸引呢
▲P&D 同埋 Candy Crush 既檔攤好有心機，前者砌左一隻金蛋龍，希望來年大家抽多幾隻金蛋；後者就用滑梯重現 Candy Crush 介面，一望就知道
年宵爆趣 003: 講呢啲？！玩味 Whatsapp 錄音咕臣！
當 Whatsapp 加入錄音功能之後，唔少朋友已經當左佢係對講機用（連打隻字都懶）。估唔到年宵市場都有順應呢個潮流既咕臣推出！版主同實習生 Eric 試過呢個咕臣可以重覆錄音用埋播放，用起上黎都算簡單，不過電池可以用幾耐就真係冇人知啦。
▲除左「講呢d」之外，亦有「傻豬」款式，價錢接近 $200 一個，影相放上 Facebook 分享可以平 $10
年宵爆趣 004： 狼來了！千其唔好激嬲「路姆西」啊！
今年唔係羊年，更加冇可能係狼年啦，所以維園會狼踨不算多，主要集中係政黨的攤位，不過都唔係用來賣，係爆擺出翻版「路姆西」比人任影唔嬲。版主見到只有一檔賣「正牌」「路姆西」……仲要吊起黎賣！$120 一隻，比起之前 IKEA 貴好多。新年流流都要見到佢，都認真唔多開胃
。
▲年宵入面有幾隻路姆西，左邊係用紙版砌成既「Q 版」，右邊真人大小版本比較醜惡，始終係「狼」黎架麻
，你去幾個政黨攤位，就會見到佢地。▲嘩！吊高「路姆西」黎賣？！原價一隻 $99.9 既路姆西賣到 $120 蚊，咁年宵都係要賺錢既
年宵爆趣 005： 哈哈哈吹氣雞汁
講到上年發生既事，都唔係得「路姆西」一樣野，仲有唔少野值得得地回顧下。城大管理系二年級生，把 2013 發生既事情設計左一款遊戲棋，入面所有公仔都係佢地自己畫，要講遊戲性既話就未必好玩，但作為一個紀念都唔錯既。同場仲有萬能既雞汁咕臣，買左會唔會「哈哈哈哈哈」笑唔停呢？
▲本地創意是值得支持的，睇番棋盤原來上年都有好多潮流發生過，包括「半澤直樹」同埋「進擊的巨人」
年宵爆趣 006： 賣鼓定賣藝？「激鼓樂社」賣吹氣年鼓敲得響！
行年宵聽得最多就係叫賣聲，但係有一檔相當特別係有歌聲同埋鼓聲！正正就係銅鑼灣入口既「鼓樂社」有一班年輕人一邊吹歌一邊演奏，唔講仲以為佢地係開檔賣藝。其實佢地有賣一啲自制既樂器，亦有賣一些匙扣之類既小飾物，對敲擊樂有興趣既話仲可以報讀課程。
▲一班充滿朝氣既年青人，亦有唔少人行過湊熱鬧，版主都想入去 Jam 埋一份
▲有賣唔少自家制樂器，亦有匙扣一類飾物
年宵爆趣 007： $20 一本連環畫！即影即有 3 分鐘起貨！
行年宵其實都唔係為左尋寶既，好多時都係想留低個美好回憶姐。維園年宵入面都有檔影相檔叫「馬年開心翻」就專賣影相服務。一班年輕人唔係學人玩復古賣 Insta Photo ，而係利用連拍影低幾張相、將釘裝成為連環圖，翻一翻頁就重現幾秒既動作。整個過程 3 分鐘起貨，開價 $20 一本，之後會唔會加價呢？
▲佢地有準備一啲小道具比大家用，版主見到有「六舊腹肌」同埋 Hulk 既拳套
▲印出黎畫質都唔錯，十幾頁可以重現 3 秒左右既動作。佢地話今年係第一次搞，所以未有 Facebook Page ，成功既話會下年再見？
年宵爆趣 008 ：正宗 MTK 手機！寫明可以睇色情網站
紅米係用 MTK ，最新既八核手機都係用 MTK ，估唔到維園今年都賣 MTK 手機！呢部號稱臺灣大哥大既 P6S 睇落好似華為 Ascend P6，但係前鏡頭同埋閃光燈位置唔同。（MT 6582 亦都唔係雙四核而係單四核），版主睇一睇 Spec 表更加嚇一驚，呢部機係可以支援雙卡 + 4G LTE ，信不信由你啦。
▲「點解還要挨貴機？」呢個問題版主一直都諗唔通！不過呢部機係咩規格先？係雙四核定真係八核？8GB 定係 64GB ？除左知道賣兩千幾之外真係乜都唔知
。
▲ 賣點係打通成人網站。。。。。。
年宵爆趣 009 ：年宵手機配件平賣？！仲貴過黃金、街邊價！
有睇 ePrice.com.hk 既都知道版主 Eddie 每星期都會行黃金、先達、星際等唔同既腦場，偶然係地鐵站見到有賣手機殼都會去八下賣幾錢，當見到維園年宵價錢我都不禁搖頭
。入面賣既外置電同埋手機殼真係唔算特別平，又唔似往年有好多特色手機套賣，網友真係唔需要花時間多睇啦。
▲半價賣手機套好似好吸引，其實夜晚係旺角地鐵站出面都有幾檔用呢個價錢賣，點解要入去同人迫住買？
年宵爆趣 010：$30 豪食翅、鮑魚？定係過天后篤魚蛋？
行完一輪又開始肚餓，網友會唔會選擇係維園入面醫肚？今年近銅鑼灣入口的小食攤位，被「會所一號」包起左，由賣街邊小食，變了賣高檔去飲菜單 今年有推出 $30 飽魚、 $30 花膠素翅同埋 $30 燕窩，呢個價錢份量真係唔足以醫肚，真係肚餓既就考慮過天后食啦。果邊篤串魚蛋都係 $6 ，格仔餅 $12 ，去埋 7-11 買野飲都分分鐘 $30 有找，如果真係想平價試食鮑魚、燕窩既，咁食下都無妨既。
▲$30 鮑魚感覺同食螺片味道差唔多，片餅乾浸完汁亦唔覺特別好食；至於花膠素翅呢，實習生 Eric 就話味道同飲宴既湯底差唔多，差在真係一條翅都食唔到。
網友行花市有乜爆趣料？齊齊以 Facebook 回應傾傾吧！