Samsung 鬧嘅網友唔少，喜歡睇嘅網友亦多，於是為了讀者著想，只要有關 Samsung 手機的傳聞一出，媒體都會爭相轉載報導，當然唔少得我哋一班版主。既然 Galaxy S5 已經發表，一切塵埃落定，版主虎仔就將之前報導過嘅傳聞悉數拎出嚟回帶，究竟有幾多堅，幾多流，而家一眼睇哂！跳轉盡情恥笑啦！
[SEP]
翻查紀錄，最早嘅 GS5 傳聞係去年 10 月 22 日「自家鏡頭唔多掂？Samsung GS5 或轉用 Sony 相機模組」傳聞話 GS5 會有 16MP 相機，但就由 Sony 提供。16MP 證實冇錯，至於係咪 Sony，稍後就知道。之後到 11 月 28 日「規格曝光？Galaxy S5 有金屬塑膠兩款機身、大容量電池」，傳聞提到有金屬殼，用 Snapdragon 805、64 bit Exynos Octa 八核 CPU、5 吋 AMOLED 螢幕、2K 解像度、3GB RAM、16MP + 2MP 相機，仲有 4,000mAh 電池。Well！除了相機估中，其他.... X！講呢啲！
去到 12 月 19 日，傳聞更誇張「Samsung Galaxy S5 傳聞：2K顯示螢幕、虹膜掃描」，韓國媒體話收到風，GS5 會有 2K 螢幕（又嚟？），更會用虹膜掃描作為手機解鎖。簡直同 Mission Impossible 啲科技睇齊。堅定流？你話呢？
踏入 2014 年，1 月 5 日版主虎仔見好多傳聞，決定整合成一篇「信不信由你！Samsung Galaxy S5 傳聞大雜錦」。裡面提到會有售價 800 歐元的金屬機身，650 歐元的塑膠機身。又話會採用 5.25 吋 2K Super AMOLED 螢幕，64 bit Exynos 6 或 Snapdragon 805 CPU、16MP 相機、簡潔的全新設計 TouchWiz UI，眼球追蹤會成為賣點。最後，還會有 N 個版本。結果係，除了使用 Super AMOLED、16MP 相機同 TouchWiz 改版，通通錯晒！
之後，版主 Keith 喺 1 月 21 日大發神威，報導了「Samsung Galaxy S5 二月廿三日 正式發表機會高」，裡面澄清咗虹膜掃描應該係流料。但同時亦寫咗有關 GS5 嘅規格傳言：『採用 MSM8974AC 這顆高通 Snapdragon 800 2.5GHz 四核心處理器，而記憶體和 USB 傳輸埠規格都向 Note 3 看齊，分別搭載 3GB RAM 與 USB3.0。更有傳聞指出，Galaxy S5 將搭載 Android 4.4 作業系統版本，螢幕解析度也將一舉提升到 2K 等級，甚至加入比 iPhone5 和 HTC One Max 更先進的指紋辨識技術。而大家特別在意的相機功能部分，Galaxy S5 將搭載 200 萬像素前鏡頭，以及標榜畫質將有明顯提升且零組件更精小的 1,600 萬像素 ISOCELL 感光元件的主鏡頭，當然 4K 錄影肯定也是少不了的。』除咗 3GB RAM、2K 螢幕之外，好多都準確喎！不過，同時報導了會推出更高階，採用金屬機殼的 Galaxy F，不過未有發佈。而日期亦唔係 2 月 23，而係 2 月 24 日。
到咗 2 月初，版主 Eddie 都加把嘴引述韓國消息，「Samsung 確認 Galaxy S5 發佈日期？！Quad HD + S805 打 iPhone」，裡面仲有一幅接近零邊框嘅構想圖。傳聞又係 2K 螢幕、Snapdragon 805 + Exynos 6 CPU、3GB RAM、16MP + 3.2MP 相機、3,200mAh 電池。結果，又係押錯注啦！
距離正式發佈越來越近，版主虎仔繼續吹水唔抹嘴，「安兔兔再次洩密！美版、國際版 Galaxy S5 規格大不同」，話說安兔兔爆出有美國版同國際版兩款 GS5，其中一款採用 Snapdragon 800（終於估中），另一款採用 Exynos 5422 八核心 CPU（呢部冇影喎）。另外，安兔兔話螢幕係 2K 解像度、16MP 相機。究竟係安兔兔放流料，抑或有測試機擾亂視線先？
到了 2 月 12 日，版主 Keith 竟然轉載了台灣 ePrice 流到爆嘅料「有盒有相有真相? Galaxy S5 規格：2K 5.2 吋芒、3000 巨量電、二千萬相機」，內容係乜？總之就係 Fail 啦！唔信，自己入去睇啦！去到正式發表前 4 日，版主虎仔終於報導了一篇完全正確嘅傳聞「傳聞 Galaxy S5 將有防水防塵功能」，內裏提及螢幕為 1080p，兼且有防水防塵，終於最後來一個全中。
老實說，版主們報導時大多數抱懷疑態度，但為了網友想知道第一手消息，就算明知回帶會被恥笑都要將消息話俾網友知道。下次睇到媒體所謂傳聞，幾多真幾多假，大家心中有數！