。如果想趁聖誕買部性價比手機，又唔介意入手水貨既話，可以留意一下最近有幾部抵玩的日水減價到好吸引了。例如可以用 $1,700 買到 FHD 屏幕 + 1600 萬像素，或者用 $2,200 唔使就入手 Qualcomm S600 + FHD 芒的機款。想知邊幾部咁抵玩就要留意呢篇版主報價啦！
防水、四核、 1600 萬像素！F-02E 賣價 $1,680 係咪抵過 Moto G?
叫得二輪日水，可能大家覺得規格會好落後，其實日系機跌價快過行貨好多，同樣是年初的規格，可能已經平過行貨同級機成半，以機論機絕對有抵玩之選。就好似版主之前介紹過既 Fujitsu F-02E ，年中賣價 $2,880 ，年尾用 $1680 就可以買到。呢部機用錢就買到 5 吋 FHD 1080p 屏幕、 Tegra 3 四核心 1.5GHz 處理器、 2GB RAM 、 32GB ROM (最大支援 64GB 外置插卡）、拍攝方面採用 1600 萬像素 Exmor R 感光元件相機、 亦有日系常見的 IP5/8 防水等級，內置的 2420 mAh 可更換式電池。版主要挑剔的是 Tegra 3 處理器真的算舊（上年年初的 HTC One X 開始用…），同 Moto G 的 Qualcomm S400 比又唔真係慢太多，加上可以插卡換電，唔到 $2,000 既價位我諗都有一定市場。
▲版主覺得呢部機芒算幾靚，又有得換電，上網又有 42Mbps 既 3G 速度，性價比真係幾唔錯
。$2,180 買 S600 + FHD！續航力值得一讚的 SH-06E
另一部版主留意到既性價比強機就係 Sharp SH-06E 啦！當時版主有點忙沒有機會做 Review ，但係身邊有朋友都趁平入手左一部，我玩過短時間個續航力真係值得一讚。當然冇官方話可以用兩日咁誇張，但用大半日都仲有 30% 算係好唔錯既水準啦！講到規格方面，Sharp SH-06E 採用 4.8 吋的 1920 x 1080 解像度屏幕、 Qualcomm S600 四核心 1.7GHz 處理器、 2GB RAM、內置 32GB 容量而且支援 64GB 插卡，拍攝方面有 1300 萬像素 f/1.9 大光圈鏡頭，同樣支援 42Mbps 的 3G 下載。講起呢部機，場價大約在 $2,180 左右，價錢比起網購的小米 2S 更加便宜，鐘意日系設計既網友可以留意一下呢部手機啊
。
▲Sharp SH-06E 各方面都睇落唔錯，係機身厚度有 10mm 唔算有型，紅、藍、白三色我覺得藍色最好睇，你地同唔同意？
日系 Sony Xperia Z1 賣價 $4,580 ！ SO-01F 支援 4G LTE
最近都有網友問日系版的 Sony Xperia Z1 的日系版 Sony SO-01F 賣價幾多，版主亦同大家打探過一下。現時 SO-01F 的日水價錢大約在 $4,580 上下，亦愈來愈多人去入手。論規格， SO-01F 同樣採用 5 吋 1920 x 1080 解像度 FHD 屏幕、 Qualcomm S800 2.2GHz 四核心處理器、 2GB RAM ，內置容量比行貨多有 32GB ，在機身支援 64GB 容量之下就唔知大家需唔需要了，鏡頭同樣是 2000 萬像素的 G Lens 和 200 萬像素前鏡頭組合，電池也是 3000 mAh 。值得一提的是這部機支援 1800 MHz 的單頻 4G LTE ，比起行貨的 1800 + 2600 當然會輸蝕少少，屏幕的顏色風格亦都有差異，登陸香港價錢只少降 $300 算係日系機中價錢幾硬的一部手機。 Sony 的粉絲會支持行貨定係考慮買平價的日水？
▲日版的 Sony SO-01F 價錢在 $4,580 ，比場內行貨價便宜，內置容量卻有 32GB 。提提大家，水貨的保養係因店鋪而異，大家入手的時侯最好問得仔細點。
可能有網友問，同價位有好多抵玩的韓國機比如話 Vega A850 、 A860 都係 2K 左右，又有 4G LTE 點解唔入手佢地。版主認為如果對 4G LTE 有要求，當然韓水的性價比很高（加上好多韓水都已經有原生中文，大部份日機仍然得英文介面
），但對於仍然在用 3G 月費的網友來說，日系的外觀和造工都是相當可取的。網友們認為日系在這個時侯算抵玩嗎？留言分享一下意見吧！在文章刊出的時侯， Sony Xperia Z1 行貨定價 $5,998 ，按此看詳細規格和最新賣價。