旗艦劈價仲!未!完!今次主打有 Nexus 6P 、魅族 Pro 5
被 csl 減過的旗艦數下數下都有唔少,好似 Samsung Galaxy Note 5 、 S6 edge+ 同 LG V10 等等。所以新一輪劈價主角就由 Nexus 6P 以及魅族 Pro 5 接班啦!兩部機都係 15 年年尾推出,所以係大鋪劈價潮當中都唔會減好多。以魅族 Pro 5 為例,有賣的衛訊都只係將 3GB RAM 同 4GB RAM 版本減左兩百。而 Nexus 6P 大鋪雖然減左兩次價,不過 64GB 大鋪價都仲講緊 $4388 ,價錢跟劈到一度賣斷市的 LG V10 只能夠打成平手。係大鋪減得唔算多的情況下, Nexus 6P 以及魅族 Pro 5 的 64GB 版本係 csl 最新一輪減價之中就顯得更吸引了。以 Nexus 6P 64GB 版 csl 而家「超激淨機價」只係 $4098 ,平過大鋪 $300 之餘呢個價錢更加係 32GB 版 Nexus 6P 個大鋪賣價一樣!
魅族 Pro 5 64GB 版情況同樣出現呢個情況,老實講上星期版主已經留意到有減價,但問店員時得到的回答卻係 32GB 3GB RAM 版減價,所以就無同大家分享到。想不到近日再去查問,原來 csl 減價的是 64GB 內置容量 4GB RAM 版魅族 Pro 5 ,價錢「即減 $600」變成 $3199 ,比起大鋪平多 $400 之餘,更加同 Pro 5 3GB RAM 版本大鋪賣價相同呢!(不過大家要留意, csl 啲減價有時 update 真係唔多夠快,版主試過問部份分店, Nexus 6P個價錢竟然無減到, Pro 5 亦出現無貨的情況,大家可能要問多幾間先入手到心頭好呢)
▲ 魅族 Pro 5 有 4GB RAM 版本,以硬件而言相當強勁,係安兔兔 6.0 排名中僅次於 Mate 8 。
安全何價?主打加密安全性強的 Blackphone 2 減 $1300
接下來要講呢部機相當冷門,就係由 Silent Circle 推出,主打擁有高安全性的 Blackphone 2 。但呢啲目標係商務用家的機種就當然唔會平,本身定價要成 $6498 。以 5.5 吋 FHD 芒,處理器係 Qualcomm S615 呢種規格仲賣過六千蚊,唔使問都知無人問津啦!有份賣的 csl 就唯有劈價,即減 $1300 之後賣 $5198 。唔知是否因為定價太高,感覺上好似減完都好似無減過咁⋯⋯入手 Note 5 邊間好?又未必係 csl
以下呢個消息唔算係新聞,但值得講下,因為 csl 係新一輪減價當中仲加入左 S6 edge ,當中 32GB 版價錢減左 $900 賣 $4798 比起大鋪平少少,而本身 Note 5 佢哋賣 $4788 都係比大鋪平 $100 。不過,以 Note 5 來計,其實中移動客戶幫襯返中移動係會比較著數,一來價錢都係 $4780 ,跟 csl 差不多,而且仲會送多個原廠無線充電板,呢樣連大鋪都無得送呢!▲ 可以見到,以 Sony Z5 系列來講, Z5 Compact 都有得減價,而 Blackphone 2 減完都仲貴過 Z5 Premium⋯⋯
▲ Note 5 版主今日到中移動門市問過,仍然有 Samsung 無線充電板送!
在文章發佈時, Google Nexus 6P 64GB 版本大鋪賣價為 $4488 ,按此看手機詳細規格及最新賣價。
在文章發佈時, 魅族 Pro 5 64GB 版本大鋪賣價為 $3599 ,按此看手機詳細規格及最新賣價。
在文章發佈時, Samsung Galaxy Note 5 32GB 版本大鋪賣價為 $4888 ,按此看手機詳細規格及最新賣價。