3HK 真正殺著？「變種」無限上網 plan 回歸！
今次內容可能有少少難理解，大家簡單理解可以係， 3HK 將 myTV Super 同「歡樂通宵」無限數據服務二合一，而且更重要係有方法不廢分毫，用到「歡樂通宵」無限數據。先重溫一下版主 Keith 之前報導，呢個「歡樂通宵」package 係「３香港 4G LTE 用戶，可以每月加 $48，就會享用到每日夜晚 11:00 至早上 07:00，以 4G LTE 網絡 1Mbps 速度無限上網。」可以見到，呢個服務只係比 4G 客戶用，係要比錢的，簡單易明。再來，睇下 3HK 今日發表的新優惠， 3HK 今日提到「 3 香港推出「歡樂通宵」無限數據上台優惠，由即日起至 4 月 30 日，客戶選用指定 4G 月費計劃上台，並登記「myTV SUPER」服務組合⋯⋯更額外送高達 12 個月免費「歡樂通宵」無限數據」並且提到，以上優惠到 3 月 31 號會完， 4 月 1 號到 4 月 15 期間就只會送 9 個月，而 4 月 16 至 30 號就會送 6 個月。以上內容都唔難理解，一句講晒就係比錢睇 myTV Super 就會送「歡樂通宵」無限數據。（當然，理解成「逼人睇大台先送無限 data」都錯唔晒嘅）。但如果只係咁簡單的話，版主就唔會話難理解啦，當中 3HK 設下的細節才是精華所在，版主剛剛就向 3HK 方面了解過，大家睇完下面 7 個重點，大家再諗抵唔抵都未遲。
▲ 留意，送 12 個月無限數據優惠只係到 3 月 31 號，到左 4 月就只係得 9 個月啦！
▲對於喜歡睇大台的朋友來講，其實下文已經無需要睇落去，因為比一個價錢（ myTV Super 月費）送埋無限數據，已經足夠吸引了。不愛大台的朋友就要睇埋下文啦！
7 大 3HK 「歡樂通宵」無限數據上台優惠重點你要知！
001 無限數據上台優惠誰可用？
其實 3HK 個「歡樂通宵」無限數據上台優惠，唔一定係新客戶上台先用到，其實本身 3HK 客戶都可以透過加簽新約的方式用到，所以不論係唔係 3HK 現有客戶，都可以用到優惠。
002 要免費用 12 個月「歡樂通宵」無限數據優惠＝焗住比錢睇大台？
如果按本身 3HK 所講「客戶選用指定 4G 月費計劃上台，並登記「myTV SUPER」服務組合」，表面上好似真係要係比左錢買myTV SUPER 服務組合（價錢方面， 3HK 客戶一係每月 $58 的優惠價，又或者係每月 $39 的增值服務）。但留意返，其實今個月 myTV Super 係 4 月 17 號之前，係有免費一個月試睇優惠的。換句話講，係申請 12 個月免費「歡樂通宵」無限數據優惠期間，登記 myTV Super 其實唔使錢，呢個就係重點所在了！
003 4 月 17 號之前申請 myTV Super 唔使錢試睇，咁又點？
重點來了，如上文所述，係 3 月 31 號之前，到 3HK 簽約，期間申請 myTV Super，就會送 12 個月「歡樂通宵」無限數據優惠。其實申請 myTV Super 後頭一個月，用家根本唔使比錢，係試用期完結之前大家都可以 Cut 左佢。而版主查問過， 3HK 表示， 12 個月「歡樂通宵」無限數據優惠 並 唔 會 因此而被取消。如果按呢個方法去做，其實係變相「簽約即送歡樂通宵無限數據」，用家不用比一分一毫都拎到優惠。
004 睇完都唔係太清楚，「簽約即送歡樂通宵無限數據」即係點？
其實呢樣係睇情況。據 3HK 資料，符合取得優惠要求的客戶有幾種： 4G SIM 月費計劃、 4G 入門 SIM 計劃以及4G出機上台計劃 (「智家Fun」分享計劃除外）。當中前兩者其實都唔需要選用增值服務。想要 12 個月「歡樂通宵」無限數據優惠，要係簽約時同時申請 myTV Super 服務組合。呢類客戶只要係試用期內 cut 左 myTV Super ，已經唔使比錢都用到 12 個月歡樂通宵無限數據。而4G上台出機客戶，有部份係需要選擇增值服務的，呢個情況下就要選用每月 $39 的 myTV SUPER 增值服務先有 12 個月「歡樂通宵」無限數據優惠，但用家之後轉用其他增值服務都不會影響到無限數據優惠。
005 當 12 個月「歡樂通宵」無限數據優惠完左之後，會點？
或者有朋友會擔心，用慣左一年無限，之後想續用，有無方法。版主都問過 3HK 方面，佢哋就提到，12 個月完之後客戶想續用，將會有特別 package ，但詳情暫時未有。
006「歡樂通宵」時段速度會點？有無得揀？
大家都知，「歡樂通宵」無限數據係指夜晚 11:00 至早上 07:00 期間，以 4G LTE 網絡 1Mbps 速度無限上網，即係並非正速上網。如果使用「歡樂通宵」無限數據優惠，呢個時段的網速就會被限制，而且無得變返正速的。
007 每月支出最少，又能享有「歡樂通宵」優惠的方案係乜？
今次 3HK 提到，其實選用「智升級」4G 入門計劃的用戶，一樣有機會得到優惠。所以每月支出最少的上網 plan 會係 1GB 數據用量的 4G 入門計劃，簽 24 個月的話每月月費係 $156 （包左附加費）。
以上就係今次「變種」 4G 無限上網上台 Plan 的詳情啦！唔知大家又點睇呢？如果有唔明都可以留言講講啊！
OTT 手機煲劇：myTV SUPER 相關連結
開台! myTV SUPER 你一定要知十五個間題
版主 5 步教你搶！3HK 五萬張免費 5GB 4G SIM 卡
谷客＋谷收視 ! TVB + 3HK 聯手 3 月份大派 5GB 免費 SIM 卡
無限上網，變面回歸! 3 香港 推 4G 1Mbps 全月任用
MyTV SUPER 手機計劃登場! 月費 $39 起
力撐 MyTV SUPER! $148 月費包寬頻 + OTT + App 收費電視
光纖寬頻+無限Wi-Fi！「MyTV SUPER」寬頻組合平價登場！
比錢睇大台？學維基、挑樂視 ! TVB Mytv SUPER 月中登場 月費最平 $38
$38 十五條收費頻道任睇! 回答十個 MyTV SUPER 你要知嘅問題
睇 MyTV SUPER = 俾大台狂 send 廣告俾你! 版主教你一招破解!
OTT 手機煲劇：NetFlix 使用天書
一個月費，美劇、電影任睇！Netflix 香港版正式啟動
Lycamobile 出動! 平 $13 兼睇有 House of Cards 嘅 Netflix
亞視永恒＋新免費電視：ViuTV 四月開台
PCCW 推出 Viu OTT 視象服務! 樂視、myTV 有新對手了......HKT 香港電訊 正式推出 4K OTT 視像內容服務
亞視提早停播! 睇晒八條 Q&A 要睇新免費電視 ViuTV 無難度
網友公投：ViuTV 同 TVB 大比拼！ 你會揀睇邊台？
ViuTV 手機搶先看! 多套節目獨家追播! 並配上繁中字幕!
搶睇 ViuTV 新免費台！ 網友必記三大日子
OTT 睇片 + 可錄影! NOW TV + 網上行推 all-in-one 4K 盒子!