▲八核心多到咩程度?當你見到鴨記幾部「山寨機」都用到 MTK 八核,最平仲要 $1,999 !
通街都係「真八核」!最平 $2,000 唔使你會唔會買?
MTK 的那顆 MT 6592 「真八核」其實都算係幾新既產品,上年 11 月採用呢粒處理器既 Zopo 小黑 2 面世,版主要到聖誕節先係香港玩到一部「真八核」手機,但已經有唔少大陸廠開始用佢。其實都係正常既,因為之前大陸牌子都鐘意用 MTK 6589 呢粒四核心,而家用同廠既八核都係意料之外吧。(仲多左個賣點:核心多左一倍)要講表現,有睇版主 THL T100s 評測 都心裡有數啦,跑分快唔過 Qualcomm S800 四核心,播 4K 影片都有問題,冇想像中咁厲害。至於「真八核」手機賣幾錢?由 $1,999 到接近 $3,000 版主都見過,當中有好似 Ulefone U658 一樣既 720p 手機,亦有用到 FHD 屏幕 + 前後 1300 萬像素既高級手機,而大多數都有一個共通點:支援雙卡雙待功能。傳聞下一代紅米都會採用 MT6592 八核心,HTC 又有可能出 MTK 八核手機 ,可能真係會成為入門至中階既一個主流。
網友覺得用 A7 架構八核既效能可唔可以滿足到你?最平 $2,000 唔使又會唔會考慮買番一部?如果有係門市/已經入手試玩過既話,留言分享一下你地試玩心得吧!
▲之前版主 Keith 都有做過 THL 八核手機的評測,這部機定價 $2,799 ,我係黃金見到最平一間賣 $2,600 左右。
▲MTK 6592 這顆處理器在安兔兔上的跑分大約在 21000 ~ 27000 之間,差距可以好大,估計同介面同埋解像度有關。講起其實幾神奇,有幾部八核上手係流暢度唔錯,亦有幾部係開機掃兩下就知道係 Lag ,真係唔可以一概而論。
▲打開報紙亦有一大堆「八核心」手機既廣告,有未聽過既牌子,亦有比較出名既比如係 Lenovo。價錢由 $1,999 到接近 $3,000 都有,黎緊應該會愈來愈多手機推出,甚至會有 MTK 真八核平板?!