日期確認！ Letv 樂視 4 月 14 中美兩地同步發佈超級手機？

Lawrence 2015-03-31 14:34 | 網絡消息

之前同大家分享左唔少有關 Letv 樂視將會推出的「超級手機」傳聞規格同賣價，而家看來距離正式推出的日子唔遠啦！因為最近 Letv 正式宣佈將會係 4 月中舉行發佈會，而且仲會係中美兩地同時舉行。想知今次發佈會有咩會推出同有咩值得大家注意？快啲睇下文啦！



首先講下今次預計發佈會將會推出的產品先，之前被大陸工信部率先「爆料」的超級手機相信好大機會係今次發佈會上推出啦。綜合之前所得的資料， Letv 好大機會推出「標準版」同「頂配版」兩種手機，「標準版」將會係用上金屬機身同埋 MTK MT6795 處理器配 2GB RAM ，而「頂配版」就會係有齊 2K 芒、 Qualcomm S810 配 4GB RAM ， 2100 萬像素相機。版主就收到風 Letv 今次推出的手機係香港開賣的機會相當大。今次 Letv 的「雙發佈會」將會係北京時間 4 月 14 號舉行，除左係北京之外同時間亦會係美國矽谷同步舉行發佈會，係第一次有中國品牌係中美兩地同時發佈，規模之大算係罕見。


▲ 最近再有網民係微博發佈 Letv 手機實機相，從圖中可見手機邊框相當窄，外型大家又 buy 唔 buy ？

最後要提提大家，因為今次的發佈會係中美兩地同步舉行，可以預期發佈會上同時推出其他產品的機會都相當大，唔知會否係年頭發佈，但當時仍然係概念階段的智能電動車呢？大家一齊估下啦！