中國聯通即日推出全新「聯通 4G Advance 月費計劃」，優惠月費只需 $138 起 (未計行政費)，聲稱係「物有所值，明智之選」，咁呢啲都係佢地講架啫，係咪真係咁著數呢? 首先，呢個計劃同之前 csl. 個「數據用量滾存計劃」有異曲同工之妙，都係可以將今個月用剩嘅數據留俾下個月用，例如你選用左 $318 10GB 的 Plan，你今個月淨係用得 4GB，咁你用剩果 6GB 就會自動累積到下個月使用，變相下個月你就可以用到 16GB。而不同的地方係，中國聯通香港呢個計劃唔似得 CSL 果個咁仲要額外加錢，佢講到明係免費嘅，聽落好似都抵過 CSL 喎! 不過，用唔晒嘅 Data 最多儲一個月，若果你第二個月都用咁少，咁之前儲落的，就會無晒架啦，但當然用唔晒，又可以轉到下個月，簡單來講，無得不停滾存。但係，唔駛俾月費都有得儲起 D Data，點都抵過 csl.
除左「數據滾存」之外，呢個計劃在固定合約期內其實仲有其他優惠，包括每個月會加送 1GB 的內地 4G 數據用量 (只適用於星期六、日，呢點有點奇怪)、合約期內豁免中港一卡兩號中國內地號碼月費、合約期內行政費半價 (要用信用卡自動轉帳) 等等。
呢個計劃仲有一個亮點，就係日本、台灣、澳門、新加坡嘅收據漫遊日費買一送一，即係平均 $49 一日 day pass，睇落幾抵咁，但其實都係有伏點要注意。睇真啲佢個服務條款，原來呢個月費計劃，每日數據的使用限制只有 500MB，如果你用超過 500MB 之後，上下載的速度會被限制至 128kbps。而買一送一嘅回贈，其實係三個月後才俾番你，即係有一個月都要收貴 daypass。此外，Daypass 優惠只去到二月底。
另外，中國聯通香港同時提供中港澳台四地數據計劃，同埋基本 $128 4G 1GB FUP 上網計劃，同樣都有「用剩 Data 數據留下個月」嘅優惠。
來源：中國聯通香港。