頻譜非商家擁有 : 2020 新限期
日日上網嘅香港人，都應該知道電話、手機號碼是透過大氣電波提供，其中 900 及 1800 頻段，差不多每個網絡商都擁有，提供包括 2G / 3G 及 4G LTE 服務。呢兩個頻段的大部份資源，會在 2020 年到期。以和記電訊 3 香港為例，當中嘅 16.6MHz 900 頻段與 23.2MHz 1800 頻段會在 2020 年到期。若果政府決定唔續牌俾現有四個網絡商，全港嘅 2G / 3G / 4G 用家，都會受影響，因為再無咁多頻段提供服務。
頻譜再拍賣
今年二月份 OFCA 就如何處理到期的 900 / 1800 頻段，提出三大方案，並會進行兩輪的公眾諮詢，第一輪諮詢將於 2016 年 5 月 18 日截止，而第二輪諮詢則將於 2016 年約第三季進行 (待定)。有關該三大方案，其實幾個月前版主 Keith 已經同大家提過，而家再同大家簡單重溫一下：
方案一：讓現有電訊商續牌 (版主備注：唔代表免費俾網絡商)
方案二：通訊局取回所有頻譜重新拍賣 (版主備注：受影響網絡商需要用額外一筆錢，投回本來已用開嘅網絡頻譜，再提供服務)
方案三：混合方案，保留五分之一的頻譜俾現有電訊商，其餘五分之四的頻譜則交回通訊局重新拍賣
通訊局將於 2017 年 11 月公佈最終決定。但呢單同錢有關嘅事，跟大家有乜關係？如果政府結果係採用方案一的話，咁就無事發生，維持現況，唔洗煩。但係如果係方案二或者方案三，即係需要重新拍賣，咁就會在 2018 年舉行拍賣，因為網絡商對前景不樂觀，要被拍賣個五份四頻道，未必會大做。
和記電訊 CEO 立場：自動續牌是唯一選擇
和記電訊行政總裁黃景輝今日公開回應睇法：「自動續牌是唯一選擇」，他表示香港是全球其中一個最具競爭力的流動通訊市場，主要手機網絡商由五個減至四個，服務 730 萬人口，而電訊商之間競爭激烈，亦不斷投放大量資金於創新服務及先進技術。若又要用巨額競投頻譜加上前期不穩定因素，成本會大大提升。最重要一句：會好難提供一個平、靚、正的電訊服務。
網友點睇？
政府透過頻譜拍賣，的確可以為庫房增加收入，但大家不要忘記，早前部份 2100 頻段同樣透過拍賣再指派不同網絡商，但結果沒有引入新網絡商，反而政府同意香港電訊收購 CSL，令香港網絡商少左一個台，之後幾年月費有加無乜點減過，有人話香港手機台月費貴到超英趕美。不過，網絡商服務又未為網友滿意。今次和記電訊搶先發聲反對再拍賣，會否是自私決定，或是真心為用家着想，大家點睇？