Note 5 、 S6 edge+ 首賣！同時推出下場各有不同？
Samsung 係上星期四先發佈 Galaxy Note 5 同埋 S6 edge+ ，今日就係香港首賣，效率對比上年頭 Galaxy S6 以及 S6 edge 可以話高左唔少。係開賣情況方面，版主從大鋪現場所見以及收到的消息來講，基本上兩部機的情況可以話係一個天一個地。 Note 5 雖然係改左玻璃作為機身主要材質後不再支援插卡同埋換電，令不少網友大表失望，但係銷情卻相當不錯，聞說同以往 Note 4 分別不是很大，更有店員話目前只剩少量現貨。相反 S6 edge+ 就不同了，版主除左見過有大陸朋友感興趣外都無乜人理，同時預訂反應聽講都麻麻。話說係之前 Galaxy S6 同 S6 edge 首賣當日，版主 Eddie 都同大家提過係先達場內係出現左「高價收機」 S6 同 S6 edge 的情況，價錢就係大約平手價或者比平手低 $100~ $200 左右。今次 Note 5 係反應算係不錯的情況下又點呢？答案係無得炒而且回收價比 S6 edge 開賣時更差的。版主問過 Note 5 回收價只係得 $4560 ，比起平手價低一千有多。原因相信係因為今次 Samsung 做足準備，兩款新機貨量比起上次 S6 同 S6 edge 時多近一倍，大家要留意啦。
▲ 雖然話就話高價收 Note 5 同 S6 edge+ ，但係⋯⋯同 iPhone 無得比啦。
Galaxy Note 5 場內有平， 64GB 水貨會到港
有意「早買早享受」的朋友相信都會想知有無方法可以用較便宜的價錢入手，除左上台有機會做到更抵的價錢之外，係先達細鋪都可以做到較大鋪平的價錢嘅。係行貨方面，場內 Note 5 的價錢版主問到最平都要 $5480 ，比官方定價 $5688 平兩舊。另外，有部份細鋪都入左水貨版本的 Galaxy Note 5 ，不過係價錢上其實不算著數，因為最平都係 $5280 ，平官價 $400 但無左保養其實都未算抵啊。最後， Note 5 主要令人失望的地方相信都係在香港只係上 32GB 版本，係無得插卡的情況下好多網友都抱怨容量會不夠用。不過如果係水貨的話就有機會買到 64GB 版 Note 5 啦！但係因為而家仲係「第一水」的階段，所以價錢都不會很平，相信過一排價錢會抵唔少，大家都可以留意一下。
▲ 其實對比之下 S6 edge+ 的水貨價錢係比起 Note 5 平更多的（比起官價平近六百），不過大家的注意力都會係 Note 5 身上吧？
▲ 場內有細鋪引入左 64GB 版本的 Note 5 ，但據知目前價錢仍然偏貴，下一批貨會較抵玩（面且仲有香港無上的黑色版）。
在文章刊登時，Samsung Galaxy Note 5 售價為 $5688，按這裡有更詳細規格及最新賣價。
在文章刊登時，Samsung Galaxy S6 edge+ 32GB 版本售價為 $6388，按這裡有更詳細規格及最新賣價。