Samsung A5 、 A7 2016 版一出即減價, csl 、 SunMobile 更抵玩?
對於 Samsung 新機 Galaxy A5 同 A7 ,版主個人覺得實在幾難作出評價。一方面以規格而言, A5 同 A7 同上一代相比改動唔算好大,主要硬件改變只有 A5 由上一代的 5 吋 HD 芒變成 5.5 吋 FHD 芒同埋將 S410 處理器改成 S615 。而 A7 更加只係由 5.5 吋升為 5.7 吋芒。換句話講,兩部機係硬件作出改變之後都只屬於普通中階機水平。但從另一個角度來講, A5 、 A7 係外型上用上 Note 5 級別的設計同造工,版主拎過實機來看感覺都幾唔錯,而且定價方面兩部機比起上一代都係平 $400 ,所以都好難話 A5 、 A7 貴得離譜。(事實上 Samsung 定價一向都比較「自信」,好難同抵玩兩隻字扯上關係)。上面提到 A5 同 A7 定價唔算太高,但又好難話抵玩,呢點看來 Samsung 、大鋪同電訊商都好清楚。因為係兩部機一推出之後,不論在大鋪還是 csl ,機價都即時劈!係大鋪好似衛訊同百老匯來講, A5 同 A7 同時「即減 $300」,令 A7 賣價由 $3298 減至 $2998 ,而 A5 賣價就由 $2898 減至 $2598 。不過,講到淨機價,其實半轉營做零售商的 csl 仲要再平!以 Galaxy A7 來計, csl 機價而家只係 $2898 ,比起大鋪再平多一百。另外, SunMobile 除左淨機價一樣有減之外,上台的話價最多減到 $700 !現時 SunMobile 做緊 $2598 (上台價)可以入手 A7 而 $2298 (上台價)就可以入手 A5 。唔知咁樣減一減大家又覺得算唔算抵呢?
▲ 大鋪好似百老匯、衛訊反應向來唔慢,昨日 Galaxy A5 、 A7 一出就即減價了!
▲ 勢估唔到 csl 同 SUNMobile 同樣快手,淨機來計 csl 仲要減得更多呢!
【以下價錢為大鋪在文章發佈時的賣價,供大家作參考之用】
在文章發佈時, Samsung Galaxy A7 (2016) 大鋪賣價為 $2998 ,按此看手機詳細規格及最新賣價。
在文章發佈時, Samsung Galaxy A5 (2016) 大鋪賣價為 $2598 ,按此看手機詳細規格及最新賣價。