千七蚊 6 系 U 四鏡手機!Nokia 5.4 開箱評測:外觀 + 效能 + 相機

左定坤 (Cho Ting Kwan) 2021-01-07 22:35 | Nokia
Nokia 近年推出唔少入門至中階嘅手機,不過命名方式真係好容易令人混亂,又二點幾三點幾四點幾等等,就算係版主自己,都唔係太分得清楚。而今日 (7/1) 佢哋又宣佈喺香港推出一部平價新機 Nokia 5.4,到底呢部手機又係乜料子呢?規格我哋之前就有介紹過,而今次我哋就借咗呢部手機返嚟,同大家做個 Hands On 評測,講兩句我對佢有乜感覺。想知詳情,睇下文啦!

FB.jpg

Nokia 5.4 賣價 + 上市資訊

開箱評測之前,先講下呢部手機嘅香港賣價以及上市資訊。Nokia 5.4 會喺 8/1 正式喺香港開賣,建議零售價為 $1798,顏色有藍、紫兩種選擇。呢個價錢一啲都唔貴,而上手過呢部手機之後,我覺得呢部手機幾值得考慮。

Nokia 5.4 開箱!終於肯送芒貼!

喺我手上嘅呢部 Nokia 5.4,係紫色嘅版本,採用咗聚碳酸酯材質嘅機殼,有 6.39 吋 HD+ 解像度芒,相比上代 Nokia 5.3 細少少,並用上咗穿窿芒設計。而比較值得講吓嘅係,以往 Nokia 手機並無送埋張芒貼,而今次 Nokia 5.4 係會附送埋芒貼,叫做係一個抵讚嘅地方。

好喇,入正題,開箱,即刻睇下部機係點。紫色 Nokia 5.4 其實算係一隻幾靚嘅顏色,外觀唔太差,硬要挑剔就係佢機背所用嘅材質容易痴塵。唔知係咪拎得多重機,上手呢部 Nokia 5.4 我又唔覺得重,但原來睇返數字上都係有 180g 嚇呆
   

S662 性能拼小米!Nokia 5.4 跑分即睇

講完外型就講效能,Nokia 5.4 用上咗 Qualcomm Snapdragon 662 處理器,內置 4GB RAM 以及 128GB ROM,電池容量為 4000mAh。版主我就唔係第一次用 S662 處理器嘅手機,不過之前試過果部小米 POCO M3,就覺得有啲窒,使用體驗唔太爽,但理論上 S662 應該係同上代 Nokia 5.3 用嗰粒 S665 性能差不多,所以我又睇下到底 Nokia 5.4 表現又點。似乎係小米 Software Tune 得差嘅問題 (可能係 Sample 機關係),今次我用 Nokia 5.4 又唔覺得好窒,至少係我認為可接受嘅範圍。

我哋又循例用安兔兔評測以及 AndroBench 5,去將呢部手機性能具體化。

Screenshot_20210107-210617.png
▲安兔兔跑分結果為 180250 分,呢個成績跟小米 POCO M3 差不多,大家都係 18 萬幾,當中 CPU 成績為 71641 分,而 GPU 成績則為 34221 分。

Screenshot_20210107-210735.png
▲ 連續讀寫速度分別為 301.64 MB/s 以及 163.26 MB/s,呢個速度同 HTC Desire 20 Pro 成績接近,對比小米 POCO M3 就慢得多。而隨機讀寫速度則分別為 93.56 MB/s 以及 88.59 MB/s,呢個速度代表在使用上順暢度一般般。

48MP 四鏡頭,可惜無 Zoom 鏡!Nokia 5.4 相機表現合格?

相機部分,Nokia 5.4 雖然只係一部千幾蚊嘅手機,但已經有四鏡頭,當中包括 48MP 標準鏡頭、5MP 超廣角鏡頭、2MP 景深鏡頭以及 2MP 微距鏡頭,可惜無 Zoom 鏡。站喺一個使用者嘅角度,我個人會覺得寧願唔要微距鏡頭,將佢換返枝 2 倍 Zoom 鏡落去,咁可能會仲吸引。

不過,一部千零蚊嘅手機,你想佢影相識飛?發夢就得。所以我都唔會太過奢求 Nokia 5.4 有好出色嘅影相質素,只要正正常常唔太差,已經相當唔錯。好彩,Nokia 5.4 都無令我失望,拍攝表現不過不失,但有少少限制,就等版主分享幾張用 Nokia 5.4 影出嚟嘅相,畀大家過目一下。
   
而在試玩這部 Nokia 5.4 的過程中,發現可能因為快門有少少慢,所以並不適宜拍攝有啲郁動的人 / 物,版主在拍攝「Model」嘅時候,已經盡量捕捉佢唔郁嘅一刻,但始終都是會有少少殘影出現。不過,千零蚊手機嘅質素,都預咗係咁上下,係我意料之內嘅事。 

小結

初步試玩過這部手機,我會覺得呢部手機重點係:抵玩!千七蚊就買到一部 S662 手機,不過 S662 今日嚟講算係一部頗為入門級別嘅手機,順暢度肯定無得同旗艦機比,但因為平,我會可以接受到。相機就主要因為有四鏡頭,影人像又得,高解像素拍攝又得,超廣角都得,叫做大部分手機有嘅功能都有,至於影出嚟係咪可接受,千零蚊,你要求得幾多? 最後,網友又會唔會考慮呢部手機呢?留言討論一下啦!

Nokia 5.4 在文章發表時,建議零售價為 $1798,按這裡有詳細規格及最新賣價

相關產品 (1)

相關報導 (1)

千七蚊 6 系 U 四鏡手機!Nokia 5.4 開箱評測:外觀 + 效能 + 相機

千七蚊 6 系 U 四鏡手機!Nokia 5.4 開箱評測:外觀 + 效能 + 相機

Nokia近年推出唔少入門至中階嘅手機,不過命名方式真係好容易令人混亂,又二點幾三點幾四點幾等等,就算係版主自己,都唔係太分得清楚。而今日(7/1)佢哋又宣佈喺香港推出一部平價新機Nokia5.4,到底呢部手機又係乜料子呢?規格我哋之前就有介紹過,而今次我哋就借咗呢部手機返嚟,同大家做個HandsOn評測,講兩句我對佢有乜感覺。想知詳情,睇下文啦!

左定坤 (Cho Ting Kwan) | 2021-01-07

最新新聞