迎接 Xperia M5 ?防水中階 Xperia M4 Aqua 百老匯減價
係中階防水機新機來講, Sony 的 M4 Aqua 真係不得不提,因為在 MWC 首次亮相時已經以親民的定價吸引到不少有意入手防水機用家的注意。係規格上雖然 M4 Aqua 不如之後會提的 HTC 舊代旗艦,但都有 5 吋 720p 解像度, Qualcomm S615 八核配 2GB RAM 以及 16GB 內置容量。相機方面都有 1300 萬像素 Exmor RS f/2.0 光圈主鏡頭同埋 500 萬像素前鏡,電池就係 2400mAh 。本身 M4 Aqua 定價 $2698 ,係性價比來講不算爆高但都唔差,近日係百老匯更減至 $2498 。如果有意入手 Sony 防水機的朋友會揀佢還是 Xperia M5 呢?▲ 減左價後, M4 Aqua 的價錢再次跟同期推出的 C4 Dual 睇齊。
HTC Butterfly 2 衛訊再減!終於見到三千樓下了
早排就有傳 Butterfly 2 有大鋪清貨,兩千蚊唔使,不少網友當場想襯機入手。不過 Butterfly 2 係衛訊在價錢方面就只係在 5 月時減左兩百蚊由 $3398 減到 $3198 。呢個價當然滿足不了大家啦!近日 Butterfly 2 係衛訊就跌到落 $2998 ,無可否認其實而家先跌到落呢個價真係有點慢,因為係今年競爭極為白熱化的情況下接近三千呢個價錢已經有不少好的選擇。不過以有齊 FHD 芒、 IP57 防水防塵、 Qualcomm S801 、中港 4G 來講 Butterfly 2 呢個價又算唔算做可以考慮?▲ 特價發售呢個價衛訊都掛左好耐了,不過跌穿三千就係近來先有。
HTC Desire Eye 大鋪做最後清貨!價錢平過細鋪,但⋯⋯
如果大家覺得 Butterfly 2 不夠抵玩的話,另一部 Desire Eye 或許可以留意一下。近日見到網上有傳 Desire Eye 係百老匯做緊 $2998 呢個價錢,早排呢部機係大鋪仲做緊 $3598 ,無啦啦平左成六百蚊咁抵玩,版主當然要去睇睇啦!到旺角的百記問過,原來有關 Desire Eye 的消息是真的, $2998 呢個價錢真的存在,不過就唔係減價。因為目前百老匯全線基本上只係剩餘陳列品的 Desire Eye ,呢批手機而家就作最後的清貨,白色版本就要 $2998 ,而藍色就會更平,只係 $2499 ,版主到數間分店問過,所餘的貨量都係得返好少,不過新淨程度來講都算可以。雖然 Desire Eye 最平兩千五唔洗又算係行貨,但陳列品並不是人人都能接受,而且價錢都未叫相當抵。想用平價入手 Desire Eye 的話又有無其他路數呢?都有嘅,係深水埗有細鋪而家仲有賣呢部機,價錢仍然係 $3198 ,據知佢哋都係只剩幾部機,賣埋就唔會返貨。而想用 $2998 呢個價入手全新 Desire Eye 行機的話其實都有方法,因為 SunMobile 的 Desire Eye 上台價都一樣係 $2998 。
最後,講多少少跟防水機有關的消息。近日有大鋪就引入左 Sony 一款防水機,價錢兩千蚊唔使,分分鐘係目前係大鋪買到的最平防水 Sony 手機。不過呢部機已經有返咁上下歷史了,講緊嘅係兩年前推出, Sony 的 Xperia ZR ! Xperia ZR 推出左咁耐理應係幾乎絕跡的,無啦啦再出現已經好難理解,最有趣係價錢仲要 $1799 ,真係耐人尋味⋯⋯
▲ 係旺角百老匯而家只有少量的陳列品,不過價錢講真又唔算係好平。
▲ SunMobile 而家都做緊 $2998 上台價,跟 LG G3 一樣,大家會點揀?
▲ Sony 的 ZR 重出江湖,呢件事比起 HTC 兩部機減價更令人驚訝。
在文章發佈的時侯, Sony Xperia M4 Aqua 定價 $2498,按此看詳細規格和最新賣價。
在文章發佈的時侯, HTC Butterfly 2 定價 $2998,按此看詳細規格和最新賣價。
在文章發佈的時侯, HTC Desire Eye 定價 $3598,按此看詳細規格和最新賣價。
在文章發佈的時侯, Sony Xperia ZR 定價 $1799,按此看詳細規格和最新賣價。