提到今個禮拜的發佈會大家可能以為版主係指 Letv ，但其實係 4 月 15 號華為一樣會係倫敦搞個發佈會，依照最近的新聞看來最少都會推出一部手機，亦即係版主虎仔之前都同大家提過的 Huawei P8 。去到英國搞發佈會其實都可以睇到華為對呢部機的重視程度，至於規格係咪都係同樣厲害呢？一齊來睇睇。
FHD 芒配 Kirin 930 八核同 3GB RAM ，傳 Huawei P8 賣價約係三千七！
可能因為 Huawei P8 兩日後就會發佈的關係，目前有關呢部機的傳聞都可以話相當完整，簡單咁講大家可以預計 Huawei P8 係一部規格上同目前大牌子旗艦有力一併而價錢都叫做有吸引力的手機。華為 P8 的外型版主虎仔之前都同大家分享過，重點就係用上左一體成型的金屬機框做為機殼材質。而係規格上 P8 都算係有競爭力的，根據中國「爆料達人」工信部資料， Huawei P8 有 5.2 吋 FHD 解像度屏幕，而處理器就用上今年先出現，係 3 月頭同大家提過嘅 MediaPad X2 上所用的八核 Kirin 930 處理器（支援 64 Bit ）配上 3GB RAM 同埋 32GB ROM （支援插卡），理論上效能都同樣係頂級水平。相機方面 Huawei P8 就用上左 800 萬像素前鏡同 1300 萬像素主鏡頭相機，電池容量係 2600mAh 同埋搭載 Android 5.0 系統。係定價方面目前都暫時未有好確實的消息，有網民就係微博上話 P8 定係大約係三千人仔，睇返上年的華為 P7 同樣係以 $3680 呢個價錢開售，所以大家都可以預期價錢上 Huawei 大約都會係大約三千七蚊呢個價位推出。 另外有傳華為會同時出一部「鉑金尊享版」，機面機背改用藍寶力玻璃，但價錢就可能成六千港紙！不過呢個消息其實並不確實，大家都係聽住先就好。
▲ 睇完流出的官圖又再睇下工信部實機照，版主相信同前代的 Huawei P7 一樣， P8 主要賣點都係外型行先。
價錢較平但規格較弱， Huawei P8 Lite
除左 Huawei P8 同場推出的好大機會仲有 P8 Lite ，呢部可以話係平價低階的 P8 。係外型上 P8 Lite 同 P8 外型相似，估計機身大小尺吋大小約為 143 x 70.6 x 7.6mm 同重 132g 。係規格上就係改用 5 吋高清屏幕，處理器都改為 Kirin 620 處理器配 2GB RAM 以及 16GB ROM ，相機就係 500 萬像素前鏡同 1300 萬像素主鏡頭相機， 2200mAh 電池容量同搭載 Android 5.0 系統。有關 P8 Lite 賣價的消息其實更加少，但相信正式發佈前會有更多消息。
▲ 同時間 P8 Lite 都有疑似實機照流出，唔知點解部 P8 Lite 比版主感覺好似 iPhone 5 ⋯⋯
分享完華為今次將會出嘅兩部機的資料，大家係咪都好期待呢？興奮就岩啦，因為係 15 號星期三的晚上十點華為就會發佈呢兩部機啦！版主到時都會係會場，大家記住留意 ePrice 了！
來源：AndroidHeadlines