由無貨加價到再減價！華為 Mate 8 大鋪又有平
上次提到 Mate 7 係大鋪「即減 $1400」，好多網友都指 Mate 8 都出了價錢又差唔遠，有乜理由入 Mate 7？其實呢點版主相當同意，以整體配置而言 Mate 8 真係高一班。關於 Mate 8 ，呢部旗艦最有趣係剛到港時，因為貨量不足，所以有大鋪由預訂價「即減 $300」變成加強版只係「即減 $100」，即係變相加價。但隨住新年後貨量增加，而且可能因為規格效能都更強的新旗艦好似 Samsaung Galaxy S7 Edge 、 LG G5 以及 小米 5 等即將開賣所影響。而家係大鋪，不論係標準版還是加強版，都已經做緊「即減 $400」，價錢第別係 $3580 同埋 $4180 。不過大鋪有平都未必夠近排有得賣 Mate 8 加強版的 CMHK 抵玩，大家都知如果非 CMHK 客戶或者無意轉台的話，幫襯 CMHK 其實唔抵。但係如果係 CMHK 客戶的話，用到 $3980 呢個客戶價就實在幾抵玩了！因為呢個正正係標準版的原價啊！
▲ 華為 Mate 8 本身只係做緊「即減 $300」，而家平多一百雖然不算多，但性價比方面都會更吸引嘅！
▲ 華為 Mate 8 而家係 CMHK 都有得賣，當中 $3980 呢個客戶價相當有競爭力！
最平 6 吋以上巨芒手機？ Lenovo PHAB 千一有找！
最強 6 吋以上旗艦要數華為，而最平就相信非 Lenovo 莫屬了！之前 Lenovo 就推出左兩部接近 7 吋的超巨芒手機。分別係規格比較好的 PHAB Plus 以及 PHAB PB1-750M 。當中以規格比較弱的 PHAB PB1-750M 較為有趣。雖然呢部機規格實在麻麻， 6.98 吋芒得 720P 解像度，處理器係 Qualcomm S410 配 1GB RAM 以及 16GB 內置容量。但呢部有 4250 大電的巨芒機係定價上本身都只係 $1699 ，而家大鋪再減之下落到 $1099 。雖然未跌穿千元價位有點可惜，但以行貨來計，同價位要搵到對手實在唔易。另一部規格較強而價錢都高一截，而且推出後回響不錯的 PHAB Plus 係大鋪都有進一步減價。除左 6.8 吋屏幕是 FHD 解像度之外，處理器都係高一級的 Qualcomm S615 配 2GB RAM 再配 32GB 內置容量（不過電池就得 3500mAh）。價錢方面 PHAB Plus 由 $2488 即減 $500 至 $1998 ，追上左深水埗細鋪方面的賣價。最後，如果大家覺得呢兩部平價 6 吋大芒機並不吸引的話，可以留意一下另一部一樣有 6.8 吋巨芒，規格更強但只得水貨的 P8 Max ，因為呢部華為舊旗艦係價錢方面兩千三有找，據聞因為性價比夠高而反應不俗。（因為比起規格相似的 MediaPad X2 更平，好多人當平板用）
▲ 硬格較弱的 PHAB PB1-750M 明顯只得入門級數，價錢方面如果落到百元價相信會幾吸引。
▲ PHAB Plus 而家係深水埗細鋪價錢都係要 $1988 左右。
▲ P8 Max 最終因為定價問題而沒有在香港開賣，係水貨方面價錢就經常會插水式下跌。
在文章發佈時，華為 Mate 8 標準版賣價為 $3580 ，按此看手機詳細規格及最新賣價。
在文章發佈時，華為 Mate 8 加強版賣價為 $4180，按此看手機詳細規格及最新賣價。
在文章發佈時，Lenovo PHAB Plus 賣價為 $1988，按此看手機詳細規格及最新賣價。