平價 16GB 魅藍 Note 一機難求！版主提你入手前三件事！
賣 $1,399 既魅藍 Note 點解咁多人搶？用呢個價錢可以買到5.5 吋 FHD 屏幕、 MTK MT6752 1.7GHz 、2GB RAM ，1300 萬像素主鏡頭與 500 萬像素前鏡頭，雖然冇得插卡同埋換電，但內置 3140mAh 電池在同級算容量大，雖然價錢就比起紅米 2 貴接近 $500 ，不過規格高一大截，所以成為唔少網友想入手的一部機。不過因為搶手的關系，所以魅藍 Note 問過幾間衛訊、csl. 都冇16GB ，魅族官方亦只有少量現貨；而 32GB方面 csl. 就有現貨可以賣，但綠色唔係每間都有，最多貨就是白色。另一方面魅藍 Note 係深水埗黃金、福仁一帶就相當多現貨，點解呢？因為佢地賣緊既就係大陸的水貨版本， 16GB 炒價最平都要 $1,699 ；32GB 甚至炒到 $1,999 的地步，比起行貨貴 $300 反而就真係冇咁吸引了。雖然有鋪話自己的貨是「有保養」，但其實都係賣緊大陸水貨啊！
其實想買魅藍 Note ，版主有些小貼士比大家參考，買之前一定要知：
1.「港行」、「陸水」一眼分得出！大家買機睇清楚！
上面都有提到，福仁、黃金一帶話「有保養」的貨有機會是陸水，如果開封之後有機會亦有機會不能退貨，咁點好呢？其實「港行」版魅藍 Note 的包裝與大陸版有所不同，上面寫的是「 M1 Note」 而大陸版寫的是「魅藍 Note」，開封之後亦可以見到「港行」版會有香港保用書和三腳插頭，一眼就睇得出，唔會買錯。2. 入手地方有三個：衛訊、csl.、魅族門市
有網友問我，點解係大鋪會搵唔到魅藍 Note ？其實呢部手機只會係衛訊、csl. 與魅族專門店（在旺角荷李活中心 19 樓，詳細地址官網有）有得賣，而如果買機的話版主都會推薦係旺角區一帶，因為可以一次去晒三個地方。另外版主收到消息，衛訊已經再次入貨，預計聽日 (3 月 11 日) 會補貨，大家可以去碰碰運氣啊！3. 港行仍不支援 2600MHz ，但支援兩個頻段的 TD-LTE啊
早兩日的試玩中都同大家講過，魅藍 Note 是不支援 2600MHz 的 FDD-LTE ，它只支援到 1800/2100MHz ，所以只收到一個頻度的 4G LTE ，某些地區接收可能會比起 1800+2600MHz 機種差；不過要留意港行魅藍 Note 是支援 Band 38(2600 CMCC) 與 Band 41 （2600 Unicom) 的 TD-LTE ，但就沒有 TD-SCDMA ，要用來當中港機還是有點勉強。4. 魅藍 Note 港行顏色方面
暫時魅藍 Note 只有白色與綠色，未有藍、粉紅、黃色，但有機會入貨的，想要其他顏色大家可以期待一下！另外要知道部機的最新賣價，當然睇睇 ePrice 既 Database 就一清二楚啦。（唔好買貴水貨啊！）5. 16GB 比較難求！最好上魅族專門店問！
版主問過魅族有沒有派 16GB 的魅藍 Note 到衛訊與 csl. ，得到來的答覆是有的。不過問過在 csl. 和衛訊工作的朋友，他們都說未收到指示，沒有 16GB 的魅藍 Note 賣。所以大家想搵最平 $1,399 的魅藍 Note ，去問專門店會較好啊！唔知網友對於入手魅藍 Note 又有咩問題呢？大家會唔會想買一部黎試下呢部性價比手機呢？可以留言討論下啊！
▲行貨是這種包裝，不要買錯啊！而港行版都是只有 1800/2100 MHz 的 FDD-LTE ，支援不到 2600MHz
▲魅藍 Note 性價比高唔高？版主 Keith 其實就試玩緊，只有 1800MHz 的 4G LTE 有冇人介意先？
在文章發佈的時侯，魅族魅藍 Note (16GB) 定價 $1,399 ，按此看詳細規格和最新賣價。
在文章發佈的時侯，魅族魅藍 Note (32GB) 定價 $1,649 ，按此看詳細規格和最新賣價。