主打「細芒」配大電!紅米 3 版主開箱
話紅米 3 「細芒」其實唔太正確,因為呢部機其實係有 5 吋芒的,唔算好細,但係電量上就真係有成 4100mAh 咁大,可以見到小米係呢部機的定位上係想做一部「細件但襟用」的紅米 Note 3 縮水版出來。但係咪代表紅米 3 係規格上有縮水呢?都唔係,因為除左大電之外,紅米 3 亦都有一個優點是現時的紅米 Note 3 所沒有的,就係支援全網通(雖然近日小米再推出左全網通版紅米 Note 3 )。基本上,大陸所有頻段(包括中國電信 CDMA )紅米 3 都支援,同時用香港 4G 亦無問題,算得上係最平全網通手機一部。▲ 一開箱可以見到,紅米 3 跟機配件同紅米 Note 3 是一樣的,充電器都是有 10W 。
▲紅米 3 其中一個賣點係支援全網通,電信 4G/3G/2G 都支援(但其實對一般港人而言雙網通都已足夠啊!)
金屬機身+「獨特」的綾格紋算美觀嗎?
係大陸,百元價位機種用上金屬機身不是新鮮事,小米同華為係上年都已經做出百元價位金屬手機。可能因為咁,小米係紅米 3 上就「搞搞新意思」,為金屬機身加上左「繁星格紋」,雖然小米係官方介紹提到「紅米 3 已經成為一種時尚」。但呢個設計算唔算好睇真係見仁見智,版主個人就覺得相當「老土」,而更麻煩係因為紅米 3 外型係以「繁星格紋」作為賣點,所以如果有意入手的朋友唔想要呢個格紋的話,就只能夠選擇「經典金色」了。外型好唔好睇其實相當主觀,不過係重量方面紅米 3 係用左 4100mAh 電池的情況下,都只係重 144g 呢點係幾令人意外,以同樣 5 吋芒版主都用緊的 HTC One A9 為例,其重量都有成 143g ,但電量只有 2150mAh 。試玩紅米 3 時版主單手可以完全握住手機,使用都算輕鬆,當然亦都唔覺墜手啦。
厚度基本上可以話係「核電」手機要面對最大的問題,紅米 3 呢方面都係做得唔錯嘅。同主打輕薄美型的 5 吋手機好似上面提過的 One A9 以及 Samsung Galaxy S6 edge 相比,紅米 3 當然會輸晒。(前者厚度為 7.26mm ,後者更只係 7mm)不過加左 4100mAh 電池都只厚 8.5mm 的紅米 3 其實比起上一代已經薄左 0.9mm ,相信都係大家能夠接受的。
▲作為一部 5 吋芒手機,單手拎當然是輕鬆的。
▲機背來講,唉⋯⋯唔識講,用左金屬材質仲有「繁星格紋」。
▲紅米 3 左邊係 SIM 卡槽,而右邊就有電源鍵以及音量鍵。
▲是的,紅米 3 可以用返 SD 卡,最大支援可以 128GB ,但係 Micro SD 卡槽要同 Nano SIM 卡槽共用,呢點大家要留意。
▲大家可以留意,紅米系列(不是紅米 Note )在機面左上角,是沒有「MI」字樣的。但係一樣有小米特色,熱感式三天皇鍵。
▲ 如果岩岩睇唔清楚紅米 3 個機背,而家再比大家睇多次~
▲ 接下來,我地用同是 5 吋芒的 HTC One A9 來同大家做個比一比,可以見到,因為 A9 有指紋掃描器,所以比較大部。
▲ 機背方面,唔使講啦,充滿偏見的版主會話 A9 好多了!
▲ 係厚度方面,因為紅米 3 電池比較大粒,自然會厚過 A9 啦。
▲再來是屏幕比一比,係調到最光的情況下,左手邊的紅米 3 其實係比較光的。
▲但係在比較可視角度的環節,紅米 3 就可以明顯見到亮度大減。
▲紅米 3 只有 HD 解像度,對屏幕細緻度要求高的朋友未必會接受到。
效能方面,相信夠用但沒有驚喜
紅米 3 的推出,我哋可以理解為 600-700 人民幣領域上的百元機,係未來都會用上中階的處理器,而呢個情況係上年鬥得火熱的大陸市場其實並未出現。換句話算今年大陸手機廠商相信仍然會持續呢場「頂爛市」大戰,中階機硬件會用在百元機,旗艦機特色會用在千元機上。不過,用上了 Qualcomm S616 的紅米 3 係效能上又點樣呢?只能說同價錢相差 100 人仔的紅米 Note 2 有一段距離。在安兔兔方面版主仍然用兩個版本( 5.7.3 以及 6.0.2)測試,出來的成績分別不大,只有三萬多分左右,比起之前 YK 試玩,規格差不多的 Moto G Turbo 還要差。但如果用百元機的標準來看,又實在不能對紅米 3 有太高要求嘅。▲首先來個安兔兔 5.7.3 的跑分,可以見到其分數只有 33194 ,屬一般中階機水平。
▲一般而言,去到安兔兔 6.0.2 係分數上都會有不同程度的提升,但係紅米 3 版主跑左兩次分,都係比起 5.7.1 更低⋯⋯
▲在 Vellamo 上面,其實紅米 3 成績不會很差,其中在 Chrome 瀏覽器方面分數更高於紅米 Note 3 。
▲ 在 Basemark 2.0 上紅米 3 有 59.30 FPS ,算係不錯。
f2.0 光圈 1300 萬像素相機支援 PDAF 相位對焦
首先版主要強調文章開首「用到 Cheap 晒」一詞沒有貶意,消費者可以用更平的價錢玩原先無咁平的硬件係件好事,況且小米能夠大量推出用上 Helio X10 的平價手機先叫「用到 Cheap 晒」吧,這樣亦反映到小米在產能上係上年進步之明顯。不過小米成功「用到 Cheap 晒」的賣點又點止 MTK 的 Helio X10 ?本來係中階以上定位手機才有的 PDAF 相位對焦同樣被小米用了在紅米 Note 2 上,價錢只平一百人仔的紅米 3 當然都會有份啦。試玩時,紅米 3 的對焦表現算係可以,但要留意係 HDR 功能方面,版主試用時反應係頗慢的,拍照後快門鍵會顯示 loading 最少兩三秒,個人認為平時影相都係唔好開 HDR 比較好。▲ 係紅米 3 上使用 HDR 模式係一個問題,影一張相後要 load 太耐了。
小結:紅米 3 其實定位、定價都很尷尬呢⋯⋯
不論係試用手機還是打稿期間,版主都不斷問自己同一個問題,如果要買紅米 3 ,點解我唔加多少少錢買紅米 Note 2 呢?相信呢個就是紅米 3 主要問題所在了,紅米 3 某程度上缺乏了一個能令大家「狗衝」的賣點,而且小米在百元至千元間的手機產品本身已經有好多選擇,多左一部紅米 3 反而做成「自己打自己」。無錯,紅米 3 有 5 吋芒可以吸引到不喜歡大芒的朋友,但係只有 HD 解像度又係咪人人都接受到?的確,紅米 3 相比價位相近的紅米 Note 2 多左金屬機身,但說實的小米在呢個價位上係有「睇餸食飯」,金屬機身質感遠不如貴價金屬機好,算不上甚麼賣點。即使版主個人愛用 5 吋左右的細芒機,但如果要從紅米 3 以及紅米 Note 2 兩者中二擇一,都係會選紅米 Note 2 ,反正價錢差得不遠。(紅米 3 定價 699 人仔,約為 $830 港幣,而現時紅米 3 的水貨已經到港,不過「第一水」的價錢要價 $1080)
在文章發佈時,紅米 3 在香港推出日期未定,接此看手機詳細規格及最新賣價。
鳴謝:Lucky Digital Store 好運數碼 ( 5465-5886 )