二千有找，性價比超高，十核心有大容量
又要大容量，又要平價，諗都諗到，邊有咁大隻蛤乸隨街跳丫？唔係無嘅，但選擇唔多，真係有嘅，多數都係小米呢啲先做到真正平價。講到有 128GB 容量的小米手機，無錯上代旗艦小米 5 係有，不過 128GB 版本並唔抵玩，真係抵玩嘅，應該係得 32GB 或者 64GB 版本，去到 128GB 就要賣超過 $3000，網友肯定會話，$3000 買部小米機？無事嘛？而版主行場時見到，目前比較平價而又有 128GB 選擇的手機，應該會是紅米 Pro，不過香港唔會推出行貨，只能買水貨，最大容量版本 128GB，最新賣價約為 $1980。二千有找，有部大容量手機，唔過份吧？
▲ 紅米 Pro 128GB 最新賣價約為 $1980。
想要大芒大容量，小米 Max 又會是你選擇嗎？
其實紅米 Pro 確係性價比相當高，而且咁平嘅價錢就有 128GB 儲存容量，算是抵玩。不過如果你話，紅米 Pro 5.5 吋屏幕我都係嫌唔夠大，我想要一個大大大芒，咁仲有無其他選擇呀？平價、大芒而又大容量的手機當中，相信非小米 Max 莫屬。小米 Max 有 6.44 吋特大屏幕，具備通話功能，真係用來睇片又得，打機又得，講電話都得，當埋平板用仲得 (版主 Keith 實試過，刷成 CM ROM 當平板用)，而且最重要的是，價錢唔貴，講到 128GB 版本，都只係貴紅米 Pro 少少，水貨價大約為 $2100。大容量小米平價手機，網友會揀紅米 Pro 還是小米 Max 呢？
▲ 紅米 Pro 唔夠大部，小米 Max 同樣又係平價，而且有 128GB ROM，又會唔會考慮呢？
Amazon 大優惠！雲端手機 Nextbit Robin 千五入手！
真正令版主覺得，近期最抵買的手機，不是小米，而是雲端手機 Nextbit Robin。唔知大家仲記唔記得呢部手機，版主曾經介紹過，呢部手機係出自前 HTC 設計師的手，外觀有點像 Sony 手機的風格，非常靚仔。雖然從表面來看，呢部 Nextbit Robin 內置只有 32GB ROM，但因為佢主打雲端儲存，額外會有 100GB 的雲端空間。同一般 Google Drive 果類的雲端不同的是，Nextbit Robin 基本上係同雲端空間結合左，系統會自動學習用家的使用習慣，將一些平時比較少用的檔案或者軟件，備份到雲端上，並在手機中暫時移除，以節省手機的空間，唔怕唔夠容量用。
呢部手機原價賣 399 美金，折合港幣約 $3100，不過後期官網減價至 299 美金 (約港幣 $2319)。但最近發現，美國 Amazon 做緊減價優惠，賣緊 $179.99 美金 (其實原本仲平，賣 169.99 美金)。不過，美國 Amazon 唔會送貨到香港，所以就需要找代購公司如 He_Shop 幫忙代購，版主問過，搵佢地代購連運費，大約都係只需 $1500，呢個價都算係非常抵玩，而且拎出街用唔會失禮，又比較其他手機與眾不同，網友又會唔會考慮一下呢？
紅米 Pro (128GB) 在文章發表時，水貨價約 $1980，按這裡有詳細規格及最新賣價。
小米 Max (128GB) 在文章發表時，水貨價約 $2110，按這裡有詳細規格及最新賣價。
Nextbit Robin 在文章發表時，官網價為 299 美金，折合港幣約 $2319，按這裡有詳細規格及最新賣價。