大芒、大容量平價之選，最平 $2580 有交易，係咪最抵玩？
想買平價手機，相信不少人第一時間應該都會想起小米吧！在近期的小米手機當中，就以小米 Max 2 的 128GB 版本最便宜，水貨現時賣價為 $2580，相比大陸建議零售價的 1999 人仔 (折合港幣約 $2355)，大約貴 $200 左右，不過又平又大芒又大容量，相信呢個價已經係無對手。而大芒大容量，都有另一個選擇，就是華為 Honor Note 8，芒比小米 Max 2 大有 6.6 吋，而且仲要有 2K 屏幕，用來睇片相比小米 Max 2 更佳，而配備 Kirin 955 處理器，雖然說不上是十分好，但還是稱得上是一代旗艦 U，在性能上相信還是會比 S625 強。加上價錢上亦都不是相差太遠，水貨現時賣價只需 $2980，貴小米 Max 2 $400，網友又會唔會考慮 Honor Note 8 呢？
▲ 小米 Max 2 128GB 現時賣價約 $2580，無錯係有大芒，不過未必人人都鍾意 S625 呢粒處理器。
▲ 差不多價錢，華為 Honor Note 8 會否是更好選擇呢？
平價 128GB 旗艦手機，一樣有選擇，睇你點揀！
如果唔使要求大芒，反而比較重視效能的話，亦都可以考慮一下目前最新配備 S835 處理器的小米 6，香港版本為 128GB，建議零售價 $3499。不過，如果去到呢個價錢，版主會寧願以下兩個選擇:1) 降級用上一代的小米 5s / 5s Plus，小米 5s 128GB 版本現時水貨價為 $2680，至於小米 5s Plus，香港版本身為 128GB 版本，csl. 現時賣價只需 $2649，比起小米 5s 的水貨價還要便宜。不過呢度都要再重新提提大家，小米 5s 同小米 5s Plus 雖然同是用 S821 處理器，但小米 5s 係降左頻的，實際效能跟 S820 相差無幾。不過，如果小米 5s Plus 同小米 6 俾我揀，我會選擇小米 5s Plus，反正即使用到 S835，還是一部小米手機，使用體驗未必一定會好，所以都是平有平玩好過。
2) 如果真係要買陸廠機，OnePlus 5 都是一部可以考慮的手機，相比小米 6 貴幾百蚊，但有 8GB RAM 之餘，實際使用上點都比小米好不少。
▲ 想玩無邊框手機，小米 MIX 係一個選擇，但不能說是很好，特別是相機方面，更是比較弱。
你可能會問，版主又係度介紹大陸機。但好老實，唔理你係咪咁憎大陸機，唔理大陸機係唔係真係咁多問題存在，無可否認講到至平、性價比至高，都係小米、OnePlus 呢啲大陸品牌。如果你咁唔想用大陸機，但又要求 玩 128GB 的話，你大可以揀番三星 S8+ (大舖價 $6998)、HTC U11 (大舖價 $5398)，不過一分錢一分貨，你要付出的可能係小米果啲手機的一倍之多，你又制唔制先？
小米 Max 2 (128GB) 在文章發表時，水貨賣價約 $2580，按這裡有詳細規格及最新賣價。
小米 6 在文章發表時，香港建議零售價為 $3499，按這裡有詳細規格及最新賣價。
小米 5s Plus 在文章發表時，csl. 賣價為 $2649，按這裡有詳細規格及最新賣價。
OnePlus 5 (128GB) 在文章發表時，建議零售價為 $4188，按這裡有詳細規格及最新賣價。
Samsung Galaxy S8 (128GB) 在文章發表時，大舖賣價為 $6998，按這裡有詳細規格及最新賣價。
HTC U11 (128GB) 在文章發表時，大舖賣價為 $5398，按這裡有詳細規格及最新賣價。