1997 年推出八達通至今已經差唔多 20 年啦，唔少人可能由 97 年一路用手上張卡到今日，但第一代的八達通無辦法做到先進功能如手機 NFC 進行網上付款和查閱近 40 次付款記錄。根據八達通公司提供資料，目前市面上有大約 196 萬張合資格的第一代八達通可以進行免費更換，咁究竟點樣知道自己有無份更換呢？
一、咩八達通叫做第一代？
每一張八達通背面都有一組數字號碼，而第一代的八達通卡身最後的數字並無括號，最後數字如果有括號的話，呢張就唔係第一代八達通啦！ 八達通方面話，今次提供免費更換的都是第一代租用版八達通，姐係要比按金果類，一般有幾種顏色，包括下列幾款：
其實第一代既顏色仲有紫色既學生卡！ 另外有款個人版八達通，姐係左上角彩色果個，第一代都可以換，點知係咪第一代？可以去八達通官方網站填寫號碼檢查一下。 至於第一代買斷版例如卡通人物限定版、節日特別版之類既八達通，就唔換得啦！ 不過既然係特別版又邊度有人願意換呀？ 另外提醒一下，記得為你家中既長者檢查一下。
二、如果我確認自己係第一代，究竟邊度可以換？
換卡的地方目前有 10 個，全部都係港鐵站內。都係透過自助換卡機進行換卡程序：炮台山站、柯士甸站、奧運站、太子站、深水埗站、樂富站、將軍澳站、葵芳站、大窩口站和屯門站。帶同舊卡，找到下面呢個自動更換機後，按照提示完成更換手續。部自動更換機就係呢個樣：
三、轉卡有咩代價？
通常涉及到免費既野都有代價，睇睇大家能否接受呢個代價啦！換卡當然係一換一，你比一張舊卡出黎就得到一張新卡。轉卡只能將部分原有卡資料轉移，並非全部資料都能夠轉移，我先話比大家知道有咩資料可以無痛轉移：
八達通餘額;
最近9次交易紀錄;
自動增值服務;
八達通日日賞$;
屋苑/商業大廈/校園門禁系統;
校園管理系統;
屋苑/商業大廈/校園專用巴士;
港鐵乘車優惠及服務：
學生車費推廣計劃;
輕鐵個人八達通積分優惠;
羅湖/落馬洲特惠乘車計劃;
港鐵全月通加強版;
港鐵「即日第二程車費九折」優惠 (如適用);
港鐵特惠站優惠;
港鐵友禮會會籍及獎分;
機場快綫「多乘賞」計劃會籍及獎分;
至於有咩資料係無辦法轉換？我都係呢度話比大家知道：
大家樂Club 100會籍、積分及樂賞錢 (請勿在現階段更換八達通， 閣下之大家樂 Club 100會籍、積分及樂賞錢將於下個階段自動轉移至新更換的八達通，詳情會適時公布);
城巴/新巴全日票;
九巴全日通;
停車場時租/月租服務*;
港鐵泊車轉乘計劃*;
新渡輪月票/假日來回票*;
上面有星星符號既地方代表用戶需要保留更換八達通收據，然後自行向個別既服務供應商搞資料轉移工作！ 提醒有開車既網友，如果你想換卡，記得唔好拍卡泊車後搞轉移，你會出唔到停車場架！
四、換卡後多左咩功能？
根據八達通公司既資料，搞完一輪換卡程序後，你會有一張新卡，呢張新卡功能上會同市面上最新款八達通一樣，可以做到透過手機 NFC 進行網上付款，包括小弟最愛既淘寶！ 同埋你可以用八達通官方手機應用查閱最近 40 筆八達通交易記錄。如果你對更換八達通計劃有任何疑問，其實可以到呢度參考更多資料。
五、究竟何換唔換好？
小弟自己手上有兩張第一代租用版八達通，一張粉紅小童卡、一張紫色學生卡。就咁望落我好似會去換，但其實我另外有仲有一張新既個人八達通，我就唔會選擇更換喇！原因有三：
第一、新功能唔係人人用到，而且如果要用的話，我呢類多卡人已經有其他八達通做到 NFC 付款功能啦，何況第一代咁有紀念價值我都費事換，而且換卡要專門走去地鐵站度自助更換，對我黎講唔順路；
第二、八達通公司講明，更換計劃係自願性質，即使你決定唔換新卡，你都可以繼續無事咁好似以前咁用張卡，姐係唔換卡對你目前既使用模式係無影響；
第三、正所謂「Why Not Both？」如果我手上只有第一代八達通，我寧願選擇比按金攞多一張新八達通，因為換卡要一換一，比按金攞新卡係多一張新卡！
有無網友同我一樣手持第一代八達通？ 不如講下你會唔會換啦？