8 月13 小米發佈會,除了新的 miui 之外還有⋯⋯
8 月新機真係一浪接一浪,係大陸方面,繼 Oneplus 2 同埋魅族 m2 之後,小米都宣佈將會係 8 月 13 號於北京舉行發佈會,而家基本上可以肯定到時小米將會推出基於 Android 5.0 或者 5.1開發的 Miui 。但係有關小米出 Windows 10 平板的消息又從何而來呢?gizmochina 就指出有關小米出平板的消息係由大陸「電子產業研究所手機和電子行業分析師」潘九堂所爆料的!佢係微博上就提到「支持 win10 的小米平板第二代應該要發佈了吧。。。」咁樣。而當中呢部會行 Win10 的小米平板到底係行標準的 Win10 版本還是手機版本就未有提到。雖然呢條微博有幾成真幾成假,或者係唔係一般吹水料真係無人知,但就有外國媒體就從呢段消息中推斷出不少新資料。▲ 呢個就是「爆料」微博。
首先呢部小米平板應該會最少 8 吋以上,因為呢個係 Microsoft 對 Win10 平板的建議尺吋。另外就係推出的時間大約會係 2015 年的第三季度。最後,其實版主就有個奇想,大家都知今年小米係手機上的成績唔算相當出眾,而 Windows 平板向來都唔算係大受歡迎的產品。小米如果推只係行 Windows 的平板未必可以成為爆紅的產品啊,係呢個情況下小米會唔會推出 Win 10 Android 雙系統的平板呢?雖然機會應該唔大但看來很有趣,大家都講吓意見啦!
▲ 小米係微博上就貼左呢張圖出來,除左會有 Miui 7 之外唔知仲有無透露甚麼玄機呢?
來源:gizmochina