為專業,你捨得洗幾多錢買呢部機? 網友爆 A99II 售價會逾四萬?

左定坤 (Cho Ting Kwan) 2015-11-11 21:27 | Sony
前排版主同大家提到 Sony A-mount 相機嘅時候,發現唔少網友都好關注 A99II 呢部相機,其中一個因素可能係因為 Sony 近呢幾年都比較集中推出 E-Mount 的器材,但有關 A-mount 的消息就少之又少。之前曾經有傳聞話 Sony 將會推出一部 A99II 相機,並會於 9 月發佈。但大家有目共睹,而家已經 11 月了,十劃都未有一撇,連消息都唔係好多,好多人都質疑到底係唔係真係有呢部機。不過到最近,有外國網民 GBayer 在 Sony User Forum 上爆料,話佢知道一啲關於呢部 A99II 的重點消息,到底佢知道啲咩不為人知嘅秘密呢?

//timgm.eprice.com.hk/hk/dc/img/2015-11/11/25465/prince1025_1_1433_d7c0eabad2915469c5e31a52417352bb.jpg

首先 GBayer 爆料,就話 A99 嘅第二代其實唔係叫做 A99II。咁如果係真嘅話,呢部相機會叫咩名呢? 呢部機可能會被稱為「Wunderwaffe」,目的係為左要動搖單鏡反光相機市場。GBayer 亦都提及,呢部相機係為唔介意洗好多錢去買好相機嘅專業人士而設,所以價錢上都會好貴。不過咁,版主我又覺得貴係正常嘅,爭在會賣到幾貴呢? GBayer 就話個價錢大約為 5000€,折合港幣約 HK $41742。嘩! 又真係幾貴下喎! 不過貴唔貴呢啲野都要等有更多規格資料先能夠下定斷,可能呢部機真係好勁好「專業」呢!

另外,消息指呢部相機將會使用新的電池。不過版主我就覺得,佢用咩電都唔係話太重要,最重要係部機可以影到好高質素嘅相。先勿論 GBayer 爆嘅料準唔準確,但至少終於可以睇到有呢部 A99II 資料,算係一個唔錯嘅開始! 稍後再有更多有關 A99II 嘅消息,版主會第一時間同大家分享! 雖然目前呢部 A99II 未曝光,但唔知大家對呢部機期唔期待呢?

來源:SonyAlphaRumors

最新新聞