唔知係咪踏入馬年，HTC 流年不利，早前 CEO 周永明出席 MWC 的活動時，原本 10 分鐘的車程，因為巴塞大塞車差啲趕唔切，最後靠一位鐵騎士幫忙才可以順利準時到達。點知今次 The All New HTC One（M8）的發佈會又差啲甩轆。
[SEP]
一行接近 40 人，主要來自台灣和 6 名香港媒體，包括版主 Keith 尋日浩浩蕩蕩由香港出發直飛美國紐約，點知起飛無耐機場突然宣佈因為有乘客身體有問題，需要緊急降落日本東京，於是由直飛紐約，變成滯留東京。本來諗住叫版主 Keith 順便買啲東京手信，但航空公司安排大隊在機場附近酒店留宿一宵，但全個行程大概延誤 12 小時。
▲ 明明直飛紐約，最後變咗多一站東京，可惜只係住喺日航成田機場酒店。
版主 Keith 話，幸好今次去採訪 HTC 發佈會，因為香港 Samsung 好鍾意安排媒體 Last minute 抵達，落機馬上去發佈會，如果係 Samsung 發佈會，肯定變成遊飛機河喎。佢仲識得講笑，證明安排好好！今次隨團出發的並沒有 CEO 周永明和主席王雪紅，如果周永明有隨隊出發的話，唔知有冇飛機師拔刀相助呢？
▲ 有圖有真相，飛機真係 U-Turn 降落成田機場！
唔駛蘇師傅、玲玲師傅，版主都識得講，下次 HTC 搞大壇嘢之前，都係拜拜神或者祈下禱先比較好！