• 過路玩手機行人要罰款!香港都要跟?
    過路玩手機行人要罰款!香港都要跟?
    雖然版主虎仔靠手機新聞搵兩餐,希望更多網民可以留意手機資訊,不過每次見到有人行街掛住望手機,然後撞到人仲要怒睥對方就真係火都嚟。試過幾次放工搭小巴,有啲手機喪屍衝出馬路,累到司機要急煞,喪屍俾司機問候兩句悻悻然走咗去,不過小巴上嘅乘客就遭殃,輕則手袋購物袋內嘅物品一地都係,重則隨時會整親條頸或撞到膝頭。北歐國家立陶宛就有新招對付呢啲手機喪屍低頭族,跳轉話你知。


    立陶宛政府日前通過新法例,由 11 月開始,行人如果過馬路時唔留意路面交通環境,包括分心玩手機甚至用手機傾電話,就有機會被交通警察票控,罰款由 20 至 40 歐元不等(折合 HK$180 至 $360)。警方表示新例希望可以減少行人過馬路時,因為玩手機或其他緣故發生意外。

    原來人口只有 280 萬嘅立陶宛嘅交通意外死亡率好高,喺歐盟裡面排名僅次於羅馬尼亞同拉脫維亞,2017 年就有 68 宗致命交通意外。新法例同時強制司機要停車讓行人過馬路,咪以為純粹頒佈法例嚇下班市民,立陶宛警方表明會用 CCTV 閉路電視幫手執法。香港咁多低頭族,唔知要唔要仿效一下呢?

    資料來源:firstpost
     
    • 2018-10-05
    • 暱稱:虎仔
    • 文章分類:網上奇趣
    • 閱讀 8657 次
    • 1篇討論