今日香港推出咗 Disney+ 服務，唔知大家登記咗未？未登記嘅話，可以聽返我哋係 Clubhouse 開房討論嘅試玩 Podcast，聽咗你就會知點解 Disney+ 會咁多人留意。而佢哋嘅收費，又可以 K.O. Netflix 嗎？
[SEP]
以下是文字節錄版主阿坤文字分享
想知其他版主或者台下聽眾對 Disney Plus 有乜意見？立即 Click 入呢到，或者下圖嘅 Clubhouse 連結重溫啦!
啱啱初步試咗 Disney+，就由我嚟同大家分享一下，Disney+ 嘅介面，以及我使用上有乜嘢感覺。老實講，我平時就好少睇戲嘅，平時最多都係睇下 ViuTV App 啲節目，好似《全民造星IV》等等，而真係專係為睇戲嘅 App，我主要都係用過 Netflix，所以我試玩 Disney+ 嘅過程入面，我都會好自然地，拎 Netflix 去做比較，我覺得呢樣都幾正常嘅。
而講返個介面，我覺得有啲地方係同 Netflix 好相似，例如右上方都係有「投放至電視」嘅功能，而底部條 Bar 都係會有「首頁」、「搜尋」、「下載內容」，唔同嘅係，Netflix 會有「即將上線」，預告畀大家知嚟緊會有咩片上架，並且可以畀大家撳鐘仔，當上架果陣會彈通知提醒大家；而 Disney+ 暫時睇就無呢樣嘢。
而睇埋「首頁」嘅中間部分，即係 show 畀你睇有咩戲嘅位置，我會覺得 Disney+ 有樣嘢好，係會將唔同嘅系列作分類，包括「Disney」、「PIXAR」、「MARVEL」、「STAR WARS」、「國家地理頻道」等等，你想睇 Disney 相關嘅電影，你咪撳入去 Disney 度搵囉，你鍾意睇 Toy Story 呀、超人特工隊呀呢類卡通片，你又可以 click 入去「PIXAR」(彼思動畫)。整體嚟講，我係覺得都好清楚，容易幫到用家更易去搵到想睇嘅內容。
另外，首頁除咗有唔同系列嘅分類，繼續碌落去你會見到有更多唔同嘅分類，例如「原創」、「Star 重點推介」、「亞洲電影與片集」、「熱播電影」等等，呢方面我會覺得，同 Netflix 係好相似。
我平時比較鍾意睇恐怖片，特別係喪屍片，所以我就揀咗套《陰屍路》(Walking Dead) 去試睇，右上角你會見到有三個掣，一個係「投放至電視」，一個係 AirPlay，一個係字幕，而如果你撳入去字幕，你會見到有配音、字幕畀你去揀。就以 Walking Dead 為例，都有 8 種配音同埋 17 國語言嘅字幕選擇，不過作為香港人，正常都係會聽返英文同埋繁體中文字幕。而有啲電影，仲會有廣東話配音𠻹！
又返番去「首頁」，底部「下載內容」旁邊位置，會見到你個帳號嘅頭像，入到去你除咗見到「使用者資料」之外，仲會有「我的片單」、「設定」、「帳戶」等等，呢啲都同 Netflix 差不多，而撳入去設定，你會見到可以選擇淨係用 WiFi 去播放或者下載影片，並且可以選擇「節省數據」功能，以較低畫質串流播放，用較少嘅數據。其餘正常情況，都係可以播到最高 4K 解像度嘅電影。
不過有一點我認為唔好嘅地方，Disney+ 同 Netflix 一樣有咁嘅問題，就係唔可以一入到去隻 App，就第一時間見到「繼續觀看」嘅電影，Netflix 可能都仲有 Sense 少少，先畀你睇熱門選擇，然後繼續觀看，而 Disney+ 一入到去第一眼見到「原創」、跟住「Star 重點推介」，再碌落去先見到繼續觀看，呢啲細微位我有時會覺得影響到我使用嘅體驗。
至於你問我，Disney+ 同埋 Netflix 我會課邊個？係我嘅 case 嚟講，真係要課我一定會課 Disney+，因為 Netflix 我本身有 account，有朋友免費 share 畀我睇，但你話如果有一日我個朋友唔續 Netflix，咁我會課邊個呢？我會覺得雖然 Disney+ 內容相對 Netflix 較少，而且我鍾意睇嘅恐怖片真係無乜，但到真係有呢一日我朋友唔續 Netflix，到時可能我個女都大個，開始畀佢間唔中睇下卡通片，咁我可能都會選擇課 Disney+，始終會較多適合小朋友睇嘅動畫或者電影，例如我哋細細個都有睇嘅《獅子王》、《阿拉丁》之類，而且唔少都有廣東話配音，唔好講個小朋友，大人都更容易理解。以上係我初步試用完嘅睇法。唔知你又會點㨂呢？
收聽 Full Version 連結：www.clubhouse.com/room/P9KdDrvk