記版主手機失而復得經歷!的士唔見手機點算好?用呢個功能提高尋獲機會

左定坤 (Cho Ting Kwan) 2022-08-29 19:13 | 手機綜合區
意外,即係意料之外,就算你平時有幾小心,要嚟嘅,總會嚟。唔知大家有無試過,出咗街唔見咗部手機,搵唔返?我試過,我真係試過!大家都知,我哋最多係乜?手機囉!平時我出街,褲袋都會袋住 2-3 部手機,咁早排 8 月初嘅某一日出街,返到屋企發覺唔見咗部手機,絞盡腦汁回憶幾時唔見,最後估計部手機就漏咗喺的士。喺呢個時候,你會點做呢?我就用咗以下方法,就成功搵返部手機,失而復得!想知詳情,睇下文啦!

FB.jpg

分享的士上唔見手機經歷

其實我嗰陣嘅遭遇,真係幾峰迴路轉,首先返到屋企,發現唔見咗部手機,咁我第一時間做嘅,係打開電腦,因為我嗰部係 Android 手機,所以可以用返 Google 嘅「尋找我的裝置」功能,睇下會唔會定位到我部手機喺邊個位置。好死唔死,居然無法連接我部手機,我心諗,GG 了,係咪畀人攞咗,而且仲要熄埋機呢?

最慘係,你知我 SIM 卡都有唔少,我張 SIM 電話號碼係幾多,嗰刻我都唔係好記得,好在最後喺某個地方,搵得返個電話 number,咁之後就拿拿聲試下打電話去,睇下有無人聽呢?點知,真係畀我估中,部機熄埋,嗰刻我個腦好亂,點算呀,點算呀?

之後我就盡量令自己冷靜少少,回憶一下,印象中我搭的士之前,就去咗某間酒樓度飲茶,咁我就打電話去問下酒樓,有無人漏低過部手機,而酒樓表示就話無,然後我擔心緊張嘅感覺就愈來愈加劇,再諗清楚啲,唔係喎,走嗰陣我都仲有用過部手機,咁應該唔會係酒樓。於是乎,我就諗,會唔會因為嗰日着嘅褲,褲袋比較鬆,所以喺搭的士返屋企嘅途中,跣咗出嚟而又無唯意呢?

1615-1024x640.jpeg

但,喺的士度唔見手機,有咩方法可以報失?我就做咗以下三件事:

001: 打電話去「的士聯合報失服務中心」(2385 8288) 報失;
002: 打電話去 881903「馬路的事」報失 (187 2920);
003: 去警署網站報失。

而今次經驗話我知,每次搭的士最好都要記住車牌號碼,有咩事起上嚟要報失,都起碼知道車牌幾多,報失嗰陣唔會咩都唔知......

螢幕截圖 2022-08-29 下午7.04.01.jpg

好,咁做完以上三件事,除咗坐以待斃,仲有咩可以做,增加搵得返部手機嘅機會呢?

咁剛才就提到啦,我係有用過 Google Find my Device 功能,嘗試過定位部手機,但發覺連接唔到部手機,而且定位功能原來無開。當時我懷疑有兩種可能性:1) 手機畀人熄咗機;2) 我手機無 set 密碼鎖,畀人開咗機仲要洗埋機。

咁原來平時少用 Find My Device 功能,但一用發現原來都做到唔少嘢,就算你本身手機無鎖無 set password,就算 Find My Device 顯示搵唔到我部手機,但我依然可以透過 Find My Device,遙距設定返密碼,鎖咗部機佢。另外,平時無用開唔留意,原來 Find My Device,仲可以喺屏幕鎖定畫面度,顯示訊息或者電話號碼,其實嗰陣未用過,我都唔知會點顯示出嚟,即管就做咗先,留低「薄酬!如拾獲此手機,請聯絡我 XXXX XXXX」,同時亦都留低我嘅聯絡號碼,如果有人執咗,就算熄咗機都好,遲早應該都會開返部手機吧~

螢幕截圖 2022-08-29 下午7.07.49.jpg

本來以為,呢個世界邊有咁好,執到部電話仲要無鎖,仲唔同你洗機賣咗佢咩。估唔到嘅係,呢個世界真係有唔少好人,畀我遇到一個。當晚我就收到個電話,話喺的士上執到我部手機,廢事交畀司機,所以就帶走咗我部手機,但因為打開部手機發覺入面乜都無,於是乎佢就入咗我 Facebook 諗住留言畀我,但我嗰部手機個 Facebook 都係打機專用,所以我根本無留意有人喺我個 Wall 度打咗字。直到見到我 Lock 咗部機同埋有電話號碼,佢先打得返電話聯絡我。最後,就成功約返對方出嚟,畀返部電話我,本來佢唔諗住收我錢,但最後我過唔到自己嗰關,都放低咗少少薄酬,當請對方食甜品都好。

而收到部手機,先知道原來喺 Find My Device 留咗言之後,會係咁顯示嘅:

IMG_8016.jpg

螢幕截圖 2022-08-29 下午7.36.50.jpg

最後,都係好多謝你讓我知道,呢個世界仲有唔少好心人!!!超愛


 

最新新聞