【廣傳】小心拍賣 App 騙案!分享旋轉拍賣 Carousell 朋友中伏被騙個案

左定坤 (Cho Ting Kwan) | 手機綜合區
如果你屋企有無用嘅物品,打算想賣出去,相信有一個平台,你一定有用過,佢就係家傳戶嘵嘅 Carousell,中文叫做旋轉拍賣。不過,最近就有朋友仔 (下稱阿強) 向我訴苦水,就話喺旋轉拍賣度畀人呃咗,而 Google 返原來佢嘅 case,都出現過唔少次,但就算你有睇新聞都好,有時一個唔小心,可能都會唔小心中伏。我就問準咗阿強,將佢個 case 同大家分享一下。

(以下人名純屬虛構,但事件經歷真實發生)

FB.jpg

旋轉拍賣「退票黨」騙案分享

話說阿強就喺旋轉拍賣 App 入面,就放售一部手機,乜嘢手機就唔講啦,標價 $3000。咁產品上架之後,佢就好快收到唔少 PM,但用開旋轉拍賣嘅都知,好多買家都好鍾意講價,出價 $2800、出價 $2500,甚至出價 $2000 都夠膽死。而呢個時候,有一個買家,價都唔講,直接開價 $3000,咁就係因為呢個舉動,成功引到我呢位朋友踏入圈套。

成個聊天過程,都係喺旋轉拍賣嘅 App 入面進行,咁一開始都係正正常常傾交收嘅程序,問佢幾時可以交收,咁佢就話即時可以,話有朋友喺佢住址附近,可以幫佢交收,話見到佢朋友之後,佢就會戶口轉帳畀阿強。阿強都有問過對方:「無現金 / Payme / 轉數快?」對方話無,仲話戶口保障大家,講到話朝早先畀人呃完話賣假貨,仲話「收唔錢你咪畀部機佢囉,收唔到就唔好畀」。咁阿強就出於同情,就信咗佢,心諗最終收到錢就得啦,無乜所謂,於是乎就落樓同嗰位所謂「朋友」交收。

佢就提供咗佢「朋友」個車牌,話係揸車嚟。咁最終阿強就去到交收地點,果然見到有架小型貨 Van,咁佢就行埋去同佢朋友打招呼,然後阿強就同「買家」講,見到佢朋友喇,過咗數話佢知。之後佢就 send 咗張相畀阿強,話過咗數,阿強就即時打開銀行 App 睇,見到顯示「+$3000」,咁就無特別留意,就以為收到錢,畀咗部機對方。

IMG_9404.jpg
▲ 騙徒發給阿強的相片。

WhatsApp Image 2022-08-09 at 5.08.35 PM.jpeg
▲ 阿強當刻見到入帳 $3000,唯沒有注意到,上方「可用結餘」跟「戶口結餘」不相符,也不了解 CQM DEP 的意思,一不小心讓自己掉進了陷阱。

發現原來係支票

後來佢諗住去櫃員機撳返啲錢出嚟,先發覺 —— 咦?點解戶口結餘同可用結餘係兩個數字嚟嘅?於是乎佢再入去個銀行 App 度望清楚,見到寫住「CQM DEP」,佢又唔知係咩,上網查下 Google 大神,先知原來係支票入數嘅意思,之後再碌碌下,見到有啲文章講,覺得同自己經歷有少少似,嗰刻佢先心知不妙,出事了。

不出所料,第二日阿強就收到 SMS,顯示「你所存入 (銀行戶口) 的 HK$3,000.00 支票已被退回」,咁佢先確定咗自己係遇上了「彈票黨 / 退票黨」,騙徒往往就係趁你當面交收緊嘅時候,無仔細留意,就成功呃到一條水魚。

IMG_9403 2.jpg

最後阿強解決方法,就去咗報案,錄口供。而問到,如果佢有部手機嘅 IMEI 碼,有無可能查到部手機?警方就話,佢哋的確係有個系統可以追蹤到,佢仲話「同你講無追蹤,你都唔會信啦」,但要係大 case 先會動用呢個系統,好似阿強呢啲細 case,就算有 IMEI,都唔會申請到動用呢個系統,唔怪得上得新聞嗰啲,多數都係講警方點樣搗破乜乜犯罪集團,涉及價值唔知幾多百萬啦。

咁無辦法,阿強最終只好耐心等待,而家佢就希望,警方就算唔可以幫佢成功搵得返部機,都起碼可以成功將啲犯人捉拿歸案啦 痛哭。所以呢度都奉勸大家,如果你平時有用開旋轉拍賣呢類平台做買賣,都盡量用現金交易最穩陣。同埋記得將呢個 case,分享畀你身邊成日都會旋轉拍賣賣嘢嘅朋友知呀!
 
廣告