共 14 款免費領取 玩 3 年!Apple Pay 八達通終於有得換卡面!版主試玩評測 + 領取教學

左定坤 (Cho Ting Kwan) | 手機綜合區
自從我轉用了 Apple Pay 八達通之後,我已經好耐無用過實體八達通。不過,雖然 Apple Pay 八達通係方便嘅,但係實體八達通有好多唔同設計,例如 3D 八達通,或者唔同封面嘅八達通,對於有收藏控或者中意特別款式八達通嘅人來說,實體八達通都有佢嘅價值。而家,唔一定係實體八達通,就連 Apple Pay 八達通,都可以更換卡面,而且每人都可以免費領取一個!想知點領取,出嚟效果又係點,呢篇文章中就等版主為大家實測一下啦!

FB.jpg

人人有份!限時免費領取 Apple Pay 八達通卡面

為慶祝八達通踏入 25 周年以及回饋咁多位客戶嘅支持,由即日起至 2023 年 1 月 31 日,用緊 iPhone 以及 Apple Watch 嘅客戶,可以 透過八達通 App 入面嘅卡面商店中,免費領取一張卡面體驗一下,有效期為 3 年 (自領取卡面之日開始計算),而購買卡面功能將會之後先會推出。個人化卡面服務喺推出嘅時候,一共提供 5 大系列嘅卡面設計,合共 14 款,當中包括:

1. Sanrio 人氣角色系列 (共 2 款動畫卡面,包括 Hello Kitty 以及大口仔)
2. 鋼之鍊金術師系列 (共 1 款,包括愛德華‧艾力克)
3. 東京人像系列 (共 6 款,由日本人氣藝術家設計)
4. 香港人畫香港貓系列 (共 4 款,由本土藝術家設計)
5. 八達通 25 週年系列 (共 1 款,由本地展能藝術家設計)


如何領取?

第一步:更新八達通 App 至最新版本。

第二步:按進去你 Apple Pay 嗰張八達通,喺「管理八達通」嘅頁面上,會見到新增咗「八達通卡面商店」以及「我的卡面」兩個選項,我哋選擇「八達通卡面商店」。

第三步:你會見到唔同嘅八達通卡面,其中 Hello Kitty 同埋大口仔係會有動畫效果 (動畫效果只喺八達通 App 入面先會呈現)。

第四步:選擇你想要的卡面,版主選擇咗嘅係 Hello Kitty 卡面 (唔好問我係咪中意 Hello Kitty~我話我揀錯咗大家信唔信~我不依)

第五步:剔取「我確定已閱讀及同意有關條款及細則」,然後按「領取」。

第六步:最後你只要去「我的卡面」頁面上,按進去你領取咗嘅卡面,喺「將此卡面套用於你的八達通卡」位置,按下「套用」,咁就大功告成!

o03.gif

實際應用

好啦!教完大家點樣去免費領取有效期為 3 年嘅八達通卡面,雖然我就好唔開心咁揀錯咗比較女仔嘅 Hello Kitty 卡面,不過其實就算係 Hello Kitty,都比起乜都無特別!但我就覺得,Hello Kitty 同大口仔賣點應該係有動畫效果,但最後居然原來淨係 App 入面先睇到,而唔係付款嘅時候會出現動畫效果,呢點我會覺得係美中不足。最後,下面就畀大家睇下,套用咗 Hello Kitty 卡面之後,用 Apple Pay 八達通付款時嘅效果係點啦!


 
廣告