盤點大舖 9 月減價手機！小米、ASUS、Moto 有份 係咪真優惠？

左定坤 (Cho Ting Kwan) 2023-09-04 19:38 | 手機綜合區

大舖通常每過兩個月，都會換一次信用卡優惠，啱啱今個九月，又係換信用卡優惠嘅日子，於是乎版主當然會留意下，到底今個月會信用卡優惠，有無啲乜嘢手機減價呢？而呢篇文章入面，我就會同大家盤點一下，各大舖有乜手機優惠，睇下文啦！

豐澤

今個月豐澤會同 DBS 星展銀行推出信用卡優惠，而篩選返減價嘅手機，可以見到有兩部手機減價，一部就係 POCO X5 5G (128GB / 256GB)，另一部就係 ROG Phone 6D，前者我哋已經同大家分享過，其實 POCO X5 5G 所謂銀行優惠並唔抵，根本佢哋本來另外仲有特價清貨，KO 咗自己嘅銀行優惠，而後者睇真啲，由建議零售價 $7998 減至 $5198，減咗有 $2800 睇落優惠好多，但其實之前已經做緊呢個價錢，變相今個月就算換咗銀行合作，但都無新嘅手機優惠，只係將原有舊優惠當新優惠扮。

衛訊

衛訊最新合作夥伴，係滙豐信用卡，減價手機有一部，就係 Motorola G73，寫住係滙豐信用卡專享優惠。但如果有留意開手機價錢嘅，可能會話，下，2 個月前嘅銀行優惠，咪又係呢部機，咪又係呢個價？而家時隔兩個月換咗銀行話有新優惠，但結果只係換湯唔換藥，將 2 個月嘅減價，又放返今個月扮新優惠，好悶，好失望。

百老匯

百老匯今個月合作銀行係中國銀行，不過睇完佢哋嘅優惠產品，無手機，可以 close file，bye～